दाङ । दाङको तुलसीपुरस्थित राप्ती प्रादेशिक अस्पताल तुलसीपुरबाट बिरामीको रेफर गर्नेको दर घटाउने प्रयास थालिएको छ ।
पछिल्लो समय अस्पतालले बिरामीलाई रेफर गर्ने गरेको गुनासो बढेपछि लुम्बिनी प्रदेश सरकारले रेफरदर घटाउने प्रयास थालेको हो ।
प्रदेशका अर्थमन्त्री धनबहादुर मास्कीका अनुसार अस्पतालबाट रेफर गर्ने गरेको गुनासो आएपछि त्यसलाई न्यूनीकरण गर्न अस्पताललाई थप बजेट गरिएकोे बताउनुभयो ।
उहाँका अनुसार अस्पतालमा विशेषज्ञ शल्यचिकित्सा सेवा विस्तारका लागि रु साढे चार करोड बजेट विनियोजन गरिएको छ । ‘मोडुलार ओटी सेटअप’ लगायतका कार्य गर्नका लागि सोही बजेट विनियोजन गरिएको हो ।
शल्यचिकित्सा सेवा सुरु भएपछि अहिले जस्तो रेफर गर्नुपर्ने अवस्थाको अन्त्य हुने उहाँको भनाइ छ ।
‘अहिले धेरै रेफर हुने गरेको गुनासो आएको छ‘ उहाँले भन्नुभयो– ‘यसलाई घटाउनका लागि प्रदेश सरकार दत्तचित्त भएर लागेको छ । अहिले हामीले शल्यचिकित्सा सेवा सञ्चालनका लागि बजेटसमेत विनियोजन गरेका छौँ ।’
यस सेवा सुरु भएसँगै शल्यक्रियाका धेरै सेवा प्रदान गरिने र अहिले जस्तो बिरामी रेफर गर्नुपर्ने अवस्था नहुने अस्पतालका निमित्त मेडिकल सुपरिटेन्डेन्ट डा ओम अर्यालले जानकारी दिनुभयो ।
‘अहिले यो सेवा नहुँदा केही बिरामीलाई रेफर गरेर पठाउनुपर्छ‘ उहाँले भन्नुभयो– ‘अब यो सेवा सुरु भएमा मेजर अपरेशन अस्पतालमै हुन्छन् र रेफर दर घट्छ ।’ (रासस)
