विराटनगर । मोरङ जिल्लामा असार १ देखि हालसम्म आठ सय ६५ डेङ्गु रोगका विरामी देखा परेका छन् ।
विराटनगरस्थित जिल्ला स्वास्थ्य कार्यालयका अनुसार मोरङको १७ पालिकाकामध्ये सात पालिकामा डेङ्गुका अत्यधिक बिरामी देखिएको हुन् ।
कार्यालयका अनुसार पथरीशनिश्चरे नगरपालिकामा छ सय ५० जना यो रोगका बिरामी फेला परेका छन् ।
त्यसैगरी लेटाङ, मिक्लाजुङ, केरावारी, कानेपोखरी, सुनवर्षी र बेलावरी पालिकामा पनि यो रोगका सङ्क्रमित देखा परेका छन् ।
जिल्लामा अहिलेसम्म यो रोगबाट कसैको मृत्यु नभएको स्वास्थ्य कार्यालयका प्रमुख डा सुरेश मेहताले जानकारी दिनुभयो । उहाँले यो रोग नियन्त्रणका लागि स्थानीय पालिकासँग समन्वय गरी कार्य गरिरहेको जानकारी दिनुभयो ।
प्रमुख डा मेहताले डेङ्गु फैलाउने लामखुट्टेको लार्भा खोजी र नष्ट अभियान सुरु गर्नाका साथै विद्यालयस्तरमा जनचेतना अभियान सञ्चालन गरिएको बताउनुभयो । कार्यालयले डेङ्गु सङ्क्रमण देखिएका स्थानमा आवश्यक जनशक्ति परिचालन र उपचारलाई तीव्रता दिनाका साथै रोग परीक्षणका लागि आवश्यक पर्ने रक्तकिटहरू पालिकाको मागअनुसार पठाइसकिएको जनाएको छ ।
विराटनगरस्थित कोशी अस्पतालमा अहिले तीन डेङ्गुका बिरामीको उपचार भइरहेको छ । अस्पतालमा असार १ गतेदेखि आजसम्म १५ जना डेङ्गुका बिरामी उपचारका लागि आएकामध्ये १२ जना उपचारपछि घर फर्किसकेको अस्पतालका मेडिकल सुपरिटेन्डेन्ट डा चन्द्रलाल झाले बताउनुभयो ।
यो रोगको मुख्य लक्षण ज्वरो आउने, टाउको दुख्ने र पेट दुख्ने भएकाले अविलम्ब चिकित्सकसँग सम्पर्क गर्नुपर्ने उहाँको सुझाव थियो । यो रोगबाट बच्न राति झुल लगाएर सुत्ने, भान्सा कोठामा पानी जम्न नदिने, घरवरिपरि पानी जम्ने ठाउँ सफा राख्ने, पूरै बाहुला भएको लुगा लगाउने जस्ता सुरक्षा अपनाउनुपर्ने छ ।
डेङ्गु सार्ने लामखुट्टे बिहानदेखि बेलुकासम्म बढी सक्रिय हुने भएकाले लामखुट्टेलाई लार्भा उत्पादन गर्न सहज हुने मुख्यत: पानी जम्ने स्थान सफा राख्नुपर्छ । (रासस)
