भरतपुर । चितवनको इच्छाकामना गाउँपालिका–४ का वडाध्यक्ष रुद्रप्रसाद उप्रेतीले ६१ घरपरिवारलाई स्वास्थ्य बिमा गरिदिनुभएको छ ।
आर्थिक वर्ष २०७९/८० मा आफूले पाउने पारिश्रमकबापतको सेवासुविधाबाट विपन्न नागरिकलाई स्वास्थ्य बिमा गरिदिनुभएको हो ।
वडाध्यक्ष उप्रेतीले २०८० साउन ५ गते शुक्रबार गाउँपालिकाको स्वास्थ्य शाखाअन्तर्गत बिमा बोर्डलाई रु दुई लाख १३ हजार पाँच सयको चेक हस्तान्तरण गर्नुभयो । सो अवसरमा उहाँले निर्वाचनका समयमा गरेको प्रतिबद्धताअनुसार आफूले पाउने सेवासुविधाबाट विपन्न नागरिकलाई स्वास्थ्य बिमा गरिदिएको बताउनुभयो ।
उहाँले भन्नुभयो– “स्वास्थ्य बिमा गर्न नसक्दा यहाँका विपन्न नागरिक सामान्य बिरामी हुँदासमेत चन्दा माग्दै हिँड्नुपर्ने बाध्यता छ । मैले निर्वाचनकै बेला सेवासुविधा नलिने घोषणा गरेको थिएँ । सोहीअनुसार आज विपन्न परिवारलाई स्वास्थ्य बिमा गरिदिएको छु । ”
गाउँपालिका अध्यक्ष दानबहादुर गुरुङले गाउँपालिकाले १० प्रतिशत विपन्न नागरिकलाई नि:शुल्क स्वास्थ्य बिमा गर्ने लक्ष्य रहेको जानकारी दिनुभयो ।
कार्यक्रममा प्रदेशसभा सदस्य कृष्णप्रसाद सिलवालले जनप्रतिनिधिको हैसियतले गरिएको यो नमूना काम भएको जनाउँदै नागरिकसँग जोडिने काम गरेकामा धन्यवाद दिनुभयो ।
जिल्ला समन्वय समिति चितवनका प्रमुख नारायणप्रसाद अधिकारीले जनताको चाहनाअनुसार काम गर्नु हरेक जनप्रतिनिधिको कर्तव्य भएको बताउनुभयो ।
