धुन्चे । रसुवामा लम्पिस्किनका कारण धमाधम पशुचौपाया मर्न थालेका छन् । पशुचौपाया मर्न थालेछि यहाँका किसान चिन्तित बनेका छन् ।
हालसम्म जिल्लामा लम्पिस्किनबाट एक सय ५९ पशुचौपाया मरेका छन् । जिल्लाका पाँचओटै गाउँपालिकाका पशुचौपाया लम्पिस्किन रोग फैलिएको छ ।
सबैभन्दा बढी क्षति गोसाइँकुण्ड गाउँपालिकामा भएको छ । उक्त गाउँपालिकाको स्याफ्रुबेँसीमा कार्यरत पशुसेवा प्राविधिक प्रमुख सुरेश वडालका अनुसार छ वडामा लम्पिस्किनबाट हालसम्म २१ चौरी, एउटा याक र ४१ स्थानीय जातका गाईगोरुको मृत्यु भएको छ ।
‘रोग नियन्त्रणको प्रयास भइरहेको छ । स्वास्थ्यको टोली वडा वडामा खटिएको छ’ उहाँले भन्नुभयो ।
गोसाइँकुण्डभित्र करिब आठ सय पशु लम्पिस्किनबाट सङ्क्रमित छन् ।
लम्पिस्किनबाट सङ्क्रमित पशुचौपायालाई छुट्टै क्वारेन्टाइनमा राख्नुपर्ने आवश्यकता रहेको बडालको भनाइ छ । हिमाली क्षेत्रको खाली पाखामा पशुचौपाया छोड्ने चलनले रोग बढी फैलिएको उहाँ बताउनुहुन्छ ।
जिल्लाको नौकुण्ड, कालिका र उत्तरगया गाउँपालिकामा पनि लम्पिस्किन रोगबाट पशुचौपायामा क्षति भएको छ । आमा छोदिङ्मोबाहेक अन्य गाउँपालिकामा झन्डै एक हजार पाँच सय पशुचौपायाको उपचार भइरहेको सम्बन्धित गाउँपालिकाका प्राविधिकले जानकारी दिएका छन् ।
कालिका गाउँपालिकाका पशुसेवा शाखाका प्रमुख बुद्धिनाथ न्यौपानेले दक्षिणी रसुवाका पालिकाका पशुचौपायामा लागेको लम्पिस्किन रोग नियन्त्रणका लागि प्राविधिक समूह खटिएको बताउनुभयो ।
सङ्क्रमणका कारण अधिकांश गोरु बिरामी परेकाले किसानलाई धान रोपाइँ गर्न समस्या भएको छ ।
भेटेरीनरी अस्पताल तथा पशुसेवा विज्ञ केन्द्र, नुवाकोटका सूचना अधिकारी पशु चिकित्सक डा बब्लु थारूका अनुसार गत असार ३१ गतेसम्म नुवाकोट र रसुवामा गरी झन्डै १३ हजार गाई, गोरु, भैँसी र चौरी लम्पिस्किन रोगबाट सङ्क्रमित भएका छन् ।
‘रसुवाको हिमाली भेगमा लम्पिस्किनबाट चौरीसमेत मरेका खबर आएको छ’ उहाँले भन्नुभयो– रोगको अवस्थाबारे जानकारी लिन हाम्रो टोली त्यसतर्फ जाँदै छ ।’
तत्कालका लागि रोग फैलिएको ठाउँमा औषधि पठाएको डा थारूले बताउनुभयो । (रासस)
