काठमाडौँ । विश्वका शक्तिशाली पासपोर्ट (राहदानी) को सूचीमा नेपाल १०३ देशमध्ये अन्ठानब्बेऔँ स्थानमा परेको छ ।
सबैभन्दा बढी मुलुकमा पाउने अनअराइभल भिसालाई आधार बनाएर द हेन्ली पासपोर्ट इन्डेक्सले गरेको सर्वेक्षणमा विश्वका शक्तिशाली पासपोर्टको सूचीमा नेपाली पासपोर्ट अन्तिमबाट आठौँ स्थानमा परेको हो ।
द हेन्ली पासपोर्ट इन्डेक्सले विश्वका सबैभन्दा शक्तिशाली तथा कम शक्तिशाली पासपोर्टको नामसहित सार्वजनिक गरेको प्रतिवेदनमा नेपालको पासपोर्ट ३८ ओटा मुलुकमा मात्रै अनअराइभल भिसा लाग्छ ।
सूचीअनुसार सबैभन्दा कमजोर पासपोर्ट अफगानिस्तानको छ । सूचीको एक सय तेस्रो स्थानमा रहेको अफगानस्तानको पासपोर्टले २७ ओटा मुलुकमा मात्रै अनअराइभल भिसा लाग्छ ।
त्यसपछि रहेको इराकको पासपोर्टले २९, सिरियाको पासपोर्टले ३०, पाकिस्तानको पासपोर्टले ३३, यमन र सोमालियाका पासपोर्टले ३५ स्थानमा अनअराइभल भिसा पाउँछन् । द्वन्द्वग्रस्त मुलुक प्यालेस्टाइनको पासपोर्ट र नेपालको पासपोर्टले भने ३८ मुलुकमा अनअराइभल भिसा पाउँछन् ।
यी मुलुकभन्दा उत्तर कोरियाको पासपोर्ट शक्तिशाली छ । उत्तर कोरियाको पासपोर्टले ३९ मुलुकमा यस्तो भिसा पाउँछ । त्यसभन्दा पछि बङ्गलादेशले ४०, श्रीलङ्का र लिबियाले ४१ त्था कोसोभोले ४२ देशमा अनअराइभल भिसा पाउँछन् ।
सूचीमा सबभन्दा शक्तिशाली पासपोर्टको पहिलो स्थानमा रहेको सिङ्गापुर रहेको छ । त्यहाँको पासपोर्टले १९२ मुलुकमा अनअराइभल भिसा पाउँछ भने त्यसपछि क्रमश: जर्मनी, इटली र स्पेनले १९० मुलुकमा अनअराइभल भिसा पाउँछन् ।
यो अध्ययन अन्तर्राष्ट्रिय हवाइ यातायात प्राधिकरण (आइएटिए) को विशेष डेटामा आधारित रहेको हेन्ली पासपोर्ट इन्डेक्सले जनाएको छ । अध्ययनमा १९९ राहदानी र २२७ ओटा यात्रा गन्तव्यहरू समावेश गरिएको जनाइएको छ ।
