काठमाडौँ । राष्ट्रिय जनमोर्चाका अध्यक्ष चित्रबहादुर केसीले विद्युत् प्राधिकरण र नेपाल टेलिकमको लापरबाहीका कारण ज्यान गुमाउनुभएका सञ्जीव जिसीको परिवारलाई क्षतिपूर्ति दिन माग गर्नुभएको छ ।
२०८० असार ३१ गते आइतबार प्रतिनिधिसभाको शून्य समयमा बोल्दै उहाँले सो माग गर्नुभएको हो ।
‘प्राधिकरण र टेलिकमको लापरबाहीका कारण ३० वर्षीय होनहार युवा सञ्जीव जिसीको अकालमा ज्यान गयो’ अध्यक्ष केसीले भन्नुभयो– ‘म उहाँको परिवारलाई क्षतिपूर्ति दिन सरकारसित माग गर्दछु ।’
उहाँले टेलिफोनको तार र बिजुलीको थ्री फेज लाइन सँगसँगै हिँडाल्नु गम्भीर लापरबाही भएको बताउँदै अगाडि भन्नुभयो– ‘यस घटनाका लागि दोषी प्राधीकरण र टेलिकमलाई पनि कारबाही गरिनुपर्दछ ।’
अध्यक्ष केसीले टेलिकमको लाइनमा बिजुली आएकोबारे पटक पटक जानकारी गराउँदा प्राधिकरणको ध्यान नजानु गम्भीर लापरबाही भएको किटानी गर्नुभयो ।
गत असार ४ गते सोमबार नेपाल टेलिकम र नेपाल विद्युत् प्राधिकरणको लापरबाहीका कारण कम्प्युटर प्राविधिक ३० वर्षीय सञ्जीव जिसीको ज्यान गएको थियो । टेलिकमको फाइबर नेटमा करेन्ट प्रवाह हुँदा जिसीको ज्यान गुमेको थियो ।
जिसी परिवारले करिब दुई वर्षअघि काठमाडौँ महानगरपालिका वडा नम्बर ३ चक्रपथ सल्लाघारीस्थित घरमा टेलिकमको फाइबर नेट जडान गरेका थिए । टेलिकमका प्राविधिकले फाइबर नेटको तार प्राधिकरणको तारसँगै राखेर घरभित्र नेट जडान गरिदिएका थिए । त्यही बेला नै मृतकका बुबा हरि जिसीले दुवै तार सँगसँगै लैजाँदा समस्या उत्पन्न हुने हो कि भनी जिज्ञासा राख्दा टेलिकमका प्राविधिकले केही समस्या नहुने दाबी गरेका थिए ।
