बैतडीबजार । बैतडीमा यात्रुबाहक बस दुर्घटना हुँदा एक जनाको ज्यान गएको छ । दुर्घटनामा २६ यात्रु घाइते भएका छन् ।
जिल्लाको मेलौरी नगरपालिका–७ सुवाखालीमा २०८० असार २५ गते सोमबार दिउँसो बस दुर्घटना भएको हो ।
पञ्चेश्वरको चिरचौरबाट कञ्चनपुरको महेन्द्रनगरका लागि छुटेको लु२ ख२०११ नम्बरको बस सुवाखालीमा सडकबाट ३ सय मिटर तल खसेको थियो ।
जिल्ला प्रहरी कार्यालय बैतडीका अनुसार बस दुर्घटनामा परेर एक जनाको मृत्यु भएको छ ।
पञ्चेश्वर गाउँपालिका–६ रन्तोलीका २७ वर्षीय उमेश भण्डारीको उपचारको क्रममा केशरपुर प्राथमिक स्वास्थ्य केन्द्रमा मृत्यु भएको प्रहरी निरीक्षक योगेश खत्रीले जानकारी दिए ।
उनका अनुसार बसमा ३९ जना यात्रु सवार रहेका थिए ।
दुर्घटनामा २६ गम्भीर घाइते भएका छन् । उनीहरुलाई उद्धार गरेर थप उपचारका लागि प्रहरीले डडेल्धुरा अस्पताल पठाएको छ । अन्य सामान्य घाइतेको केशरपुर प्राथमिक स्वास्थ्य केन्द्रमा उपचार भइरहेको छ ।
तीव्र गतिमा रहेको बस अनियन्त्रित भएर सडकबाट तल खसेको प्रहरीले जनाएको छ ।
