काठमाडाैँ । पूर्व धावक एवं गीतकार बुद्धवीर लामाको एकल साङ्गीतिक प्रस्तुतिको पूर्व सन्ध्यामा आयोजित भेट्रान पाँच किलोमिटर शुभकामना दौड प्रतियोगितामा धर्म महर्जन र कल्पना महर्जन पहिलो भएका छन् । धर्म पुरुषतर्फ र कल्पना महिलातर्फको दौडमा पहिलो भएका हुन् ।
अन्तर्राष्ट्रिय भेट्रान प्रतियोगिताको विजेता एवं विश्वका प्रसिद्ध म्याराथन लन्डन, बोस्टन, बर्लिन, टोकियोलगायत देशमा म्याराथन दौडिसकेका धर्मले निर्धारित दूरी १८ मिनेट ४८ सकेन्डमा पूरा गरे । सोही स्पर्धामा भीमबहादुर गुरुङ दोस्रो र राजेश महर्जन तेस्रो भए ।
बैकुण्ठ मानन्धर खेलकुद नेपाल र प्रयास मञ्च नेपालले आज संयुक्त रुपमा आयोजना गरेको उक्त दौड प्रतियोगितामा कल्पनाले निर्धारित दूरी २८ मिनेट ४० सेकेन्डमा तय गरिन् । याङ्दी लामा शेर्पा दोस्रो र सीता रिमाल तेस्रो स्थानमा रहे ।
बुद्धवीर लामाको एकल साङ्गीतिक प्रस्तुतिको पूर्व सन्ध्यामा प्रत्येक वर्ष आयोजना गरिने शुभकामना दौडमा ६७ प्रतिस्पर्धी सहभागी थिए । १२औंँ संस्करणको यस वर्षको साङ्गीतिक प्रस्तुति अगष्टमा इङ्ल्यान्डको लन्डनमा हुँदैछ ।
१०औँ संस्करणको प्रस्तुति अमेरिकामा भएको थियो । ‘स्वास्थ्यका लागि दौड, राष्ट्रका लागि दौड’ नारा दिइएको दौडमा बुद्धवीर लामा आफै पनि दौडेका थिए ।
त्रिपुरेश्वरस्थित राष्ट्रिय खेलकुद परिषद् ९राखेप० को हाताबाट सुरु भएको दौड विभिन्न भागको परिक्रमा गरी राखेपमै आएर टुङ्गिएको थियो ।
विजेतालाई एथ्लेटिक्सका पूर्व प्रशिक्षक मधुशमशेर राणा, नेपाल भलिबल सङ्घकी पूर्व सदस्य एवं समाजसेवी ज्योति केसीलगायतले एक कार्यक्रमका बीच पुस्कार प्रदान गर्नुभयो ।
यसअघि दक्षिण एसियाली खेलकुदका कीर्तिमानी पूर्व धावक बैकुण्ठ मानन्धरले दौड प्रतियोगिताको उद्घाटन गर्नुभएको थियो ।
