काठमाडौं । नेकपा (मसाल) ले प्रधानमन्त्री पुष्पकमल दाहालको अभिव्यक्ति गलत भएको भन्दै त्यसबारे संसदमा छलफल हुनुपर्ने बताएको छ ।
तर, प्रधानमन्त्रीको राजीनामा माग्दै नेकपा (एमाले) ले गरिरहेको संसद अवरोधको मसालले विरोध गरेको छ । प्रधानमन्त्रीको राजीनामा माग्नुको उद्देश्य देशलाई प्रतिगमनतर्फ लैजानु रहेको मसालको ठहर छ ।
प्रधानमन्त्री प्रचण्डले भारतीय व्यवसायी प्रितम सिंहको ८८ औं जन्मदिवसको अवसरमा सोमबार राजधानीमा आयोजित कार्यक्रममा आफूलाई प्रधानमन्त्री बनाउन उनी धेरै चोटी दिल्ली गएको बताएपछि विवादमा परेका छन् ।
मसाल महामन्त्री मोहनविक्रम सिंहले बिहीबार प्रेशित गर्नुभएको वक्तव्यमा प्रधानमन्त्रीको अभिव्यक्तिबारे संसदमा छलफल हुनुपर्ने र उनले स्पष्टीकरण दिनुपर्ने स्पष्ट पार्नुभएको छ ।
यस्तो छ वक्तव्य
एमालेले प्रधानमन्त्री प्रचण्डको राजीनामाको माग गरेर संसदलाई अवरुद्ध गर्ने जुन कार्य गरेको छ, त्यसलाई नेकपा (मसाल)ले गलत मान्दछ र त्यसको विरोध गर्दछ । एमालेको त्यस प्रकारको कार्वाहीको पछाडि अहिले कायम भएको सरकारलाई विघटन गरेर देशलाई प्रतिगमनतिर लैजाने उद्देश्यले काम गरेको कुरा प्रष्ट छ र, हामीले त्यस प्रकारको प्रतिगामी उद्देश्यको विरोध गर्दछौँ ।
प्रचण्डले एउटा पुस्तकको विमोचनको सन्दर्भमा जुन प्रकारको अभिव्यक्ति दिएका थिए, त्यसलाई हामीले गलत मान्दछौँ र त्यसको आलोचना गर्दछौँ । तर त्यसबारे उनीसित स्पष्टीकरण माग्न सकिन्छ र त्यसबारे संसदमा छलफल हुन सक्दछ । तर त्यो कारणले नै प्रधानमन्त्री प्रचण्डको राजिनामा माग्ने कार्यलाई हामीले सही मान्दैनौँ ।
२०८० असार २१ गते ।
मोहनविक्रम सिंह
महामन्त्री
