काठमाडौँ । अवरुद्ध भएको २७ घण्टापछि नारायणगढ–मुग्लिन सडकखण्डमा खुलेको छ । अहिले सडक दुईतर्फी सञ्चालनमा आएको छ ।

मुग्लिनबाट दुई किलोमिटर नारायणगढतर्फ खसेको पहिरो पन्छाएपछि नारायणगढ–मुग्लिन सडकखण्ड दुईतर्फी सञ्चालनमा आएको चितवन प्रहरीले जानकारी दिएको छ । प्रहरीका अनुसार नारायणगढ–मुग्लिन सडकखण्ड साँझ ५ बजेदेखि सञ्चालनमा आएको हो ।

हिजो असार १४ गते बिहीबार दिउँसो साढे १ बजेदेखि पहिरो झरेर सो ठाउँको सडक अवरुद्ध भएको थियो ।

सडकखण्डको तुइनखोलामा पुल बनाउन लागि ठेक्का पाएको अनक कन्स्ट्रक्सनले भित्ता काट्न कठिन भएको भनेर काम छोडेको ठाउँबाट निरन्तर पहिरो खसिरहेको छ ।

सो ठाउँको मुग्लिनतर्फ ६० मिटर अग्लो चट्टान काट्न नसकिएपछि विस्फोट गराउनुपर्ने निष्कर्ष निकालेर त्यहाँ काम रोकिएको थियो ।