काठमाडौँ । नेपाल आयल निगमका पूर्व कार्यकारी निर्देशक गोपालबहादुर खड्का गैरकानुनी सम्पत्ति आर्जनको अभियोगमा दोषी ठहर भएका छन् ।
२०८० असार १५ गते शुक्रबार विशेष अदालतले निजलाई दोषी किटानी गरेको हो ।
विशेष अदालतका अध्यक्ष श्रीकान्त पौडेल, सदस्यहरू शालिग्राम कोइराला र डा. खुसीप्रसाद थारू सम्मिलित इजलासले उनलाई दोषी ठहर गरेको छ ।
अख्तियार दुरुपयोग अनुसन्धान आयोगले गत २०७८ पुस २३ गते खड्कामाथि १८ करोड ६६ लाख ५ हजार ६२९ रुपैयाँ गैरकानुनी सम्पत्ति आर्जन गरेको अभियोग लगाएको थियो ।
विशेष अदालतले उनलाई एक वर्ष तीन महिना कैदसजाय र १८ करोड रुपैयाँ बिगो भराउने आदेश दिएको छ ।
उनी डिभिजन सडक कार्यालयको प्रमुख हुँदा अनियमिततामा मुछिएका थिए । उनी कार्यकारी निर्देशक भएकै बेला नेपाल आयोग निगमको जग्गा अनियमितता प्रकरण भएको थियो ।
विशेष अदालतका प्रवक्ता दीपेन्द्रनाथ योगीका अनुसार खड्कालाई एक वर्ष तीन महिना कैदसजाय हुने ठहर भएको हो ।
उनलाई बिगोबमोजिम नौ करोड १९ लाख छ हजार ६३४ रुपैंया ६४ पैसा जरिवाना हुने आदेशसमेत भएको छ ।
प्रवक्ता योगीले भने– ‘अख्तियारले खड्काको घरजग्गा, बैङ्क मौज्दात र सेयर जफत् गर्न मागदाबी गरेको थियो । त्यो सबै जफत् गर्ने आदेश भएको छ ।’
खड्काको सम्पत्ति लुकाएको आरोप लागेका शर्मिला खड्का र अङ्किता लामाको नाममा तीन कित्ता घरजग्गा रहेकोमा तीसमेत विगोको हदसम्म जफत गर्ने आदेश भएको उनको भनाइ थियो ।
