बेइजिङ । अमेरिकी विदेशमन्त्री एन्टोनी ब्लिङ्केनले ताइवानको स्वतन्त्रतालाई अमेरिकाले समर्थन नगर्ने बताएका छन् ।
ताइवानबारे पहिलोपल्ट अमेरिकाले यस्तो धारणा दिएको हो ।
यसअघिसम्म चीनबाट ताइवान स्वतन्त्र हुनुपर्ने अमेरिकी मान्यता थियो ।
बेइजिङमा चिनियाँ राष्ट्रपति सी चिनफिङसँगको भेटपछि पत्रकार सम्मेलन गर्दै विदेशमन्त्री ब्लिङ्केनले भनेका छन्– ‘अमेरिकाले ताइवानको स्वतन्त्रतालाई सहयोग गर्दैन ।’
सँगसँगै उनले ताइवानलक्षित उत्तेजित चिनियाँ गतिविधि पनि स्वीकार्य नहुने बताएका छन् । ब्लिङ्केनले ताइवान सङ्कटमा परेमा आर्थिक सङ्कटको स्थिति आउने र सिङ्गो विश्वलाई असर पर्ने पनि बताएका छन् ।
यता, अमेरिकाले ताइवानमाथि बेइजिङको दाबीलाई पनि समर्थन गरेको छैन तर ताइवानलाई छुट्टै स्वतन्त्र राज्य पनि स्वीकार नगर्ने नीति लिँदै आएको छ ।
चीनको विकासले अमेरिकालाई पनि फाइदा
ब्लिङ्केनले आर्थिक क्षेत्रमा चीनलाई रोक्ने प्रयास अमेरिकाले नगर्ने बताएका छन् । चीनले बृहत् रूपमा आर्थिक सफलता हात पार्दा अमेरिकालाई पनि फाइदा पुग्ने भएकाले त्यसलाई रोक्ने चाहना नरहेको ब्लिङ्केनको भनाइ छ ।
‘हाम्रो राष्ट्रिय सुरक्षालाई मध्यनजर गर्दै प्रविधिका क्षेत्रमा केही प्रतिबन्ध लगाए पनि चीनलाई आर्थिक क्षेत्रमा अप्ठेरो पार्ने अमेरिकी नीति छैन । चीनले प्रगति गर्दा हामीलाई समेत फाइदा पुग्नेमा अमेरिका सचेत छ’ उनले भने ।
राष्ट्रपति सी र समकक्षी क्विन गाङसँग लामो छलफल गरेका ब्लिङ्केनले दुई मुलुकको सम्बन्धमा आएको चिसोपना सुधारका लागि दुवै पक्ष सकारात्मक रहेको ब्लिङ्केनले बताएका छन् ।
‘हामी दुवै चिसिएको सम्बन्ध सुधार गर्दै स्थिर कूटनीतिक सम्बन्ध स्थापनाका लागि तयार भएका छौँ’ पत्रकार सम्मेलनमा ब्लिङ्केनले भनेका छन् ।
त्यस्तै चीनका पूर्व विदेशमन्त्री तथा उच्च तहका कूटनीतिज्ञ वाङ यीले पनि सम्बन्ध सुधारका लागि अमेरिकाले द्वन्द्व निम्त्याउने काम बन्द गर्नुपर्ने बताएका छन् ।
‘सहकार्यको प्रस्ताव गरेर संवाद बन्द गर्ने र द्वन्द्व बढाउने अमेरिकी नीति नै स्थिर सम्बन्धको बाधक हो । अमेरिकाले सहकार्य र द्वन्द्वमध्ये एक रोजेर आउनुपर्छ’ ब्लिङ्केनसँग राखेको भनाइ उद्धृत गर्दै सी.सी.टी.भी. ले लेखेको छ ।
चीनले रुसलाई हतियार नदिने
वार्तापछि चीनले अब रुसलाई हतियार सहयोग नगर्नेमा आफू ढुक्क रहेको उनले बताए ।
‘अमेरिकाले रुसलाई हतियार नदिने प्रतिबद्धता वार्तामा बारम्बार खोजेको थियो । चीनले त्यसमा सहमति जनायो । यो निकै नै महत्त्वपूर्ण प्रतिबद्धता हो । अबउप्रान्त चीनले रुसलाई हतियार सहयोग गर्ने छैन’ उनले भने । (एजेन्सी)
