काठमाडौँ । राष्ट्रिय जनमोर्चाले जेठ २९ गते सोमबार प्युठानमा भएको सडक दुर्घटनाप्रति दु:ख व्यक्त गरेको छ ।
केन्द्रीय उपाध्यक्ष तथा प्रवक्ता दुर्गा पौडेलको हस्ताक्षरमा आजै २०८० जेठ २९ गते सोमबार जारी प्रेसवक्तव्यमार्फत् राजमोले घटनाप्रति दु:ख व्यक्त गर्नुका साथै मृतकप्रति श्रद्धाञ्जली र शोकसन्तप्त परिवारप्रति समवेदना व्यक्त गरेको हो ।
शोकवक्तव्यमा दुर्घटना भएको सडकको तत्कालै स्तरोन्नति गर्नुपर्ने तथा वाहनमा क्षमताभन्दा बढी यात्रु नचढाउने विषयमा सम्बन्धित प्रहरी प्रशासन गम्भीर हुनुपर्ने धारणा व्यक्त गरिएको छ ।
यस्तो छ, शोकवक्तव्यको पूर्ण पाठ :
“प्युठानको स्वर्गद्वारी मन्दिर पुगी फर्किंदै गरेको कार आज जेठ २९ गते स्वर्गद्वारी नगरपालिका–४ भिङ्ग्रिकोटमा दुर्घटनामा परेर आठ जनाको मृत्यु भएको दुखद् घटनाप्रति राष्ट्रिय जनमोर्चा दु:ख व्यक्त गर्दछ । हाम्रो सङ्गठन उक्त दुर्घटनामा मृत्यु भएका सबैप्रति भावपूर्ण श्रद्धाञ्जली तथा शोकसन्तप्त परिवारप्रति समवेदना व्यक्त गर्दछ ।
आज जुन सडकमा कार दुर्घटना भयो, त्यो सडक अत्यन्तै असुरक्षित छ । त्यो सडक अत्यन्त अप्ठ्यारो पनि छ । त्यस सडकको स्तरोन्नति गर्नेबारेमा सम्बन्धित निकायले समयमै ध्यान दिन नसकेकाले पनि उक्त दुर्घटना हुन पुगेको हो भन्ने प्रष्टै देखिन्छ ।
सञ्चारमाध्यमहरूले जनाएअनुसार दुर्घटनामा परेको वाहन निजी कार हो । निजी कारमा चालकसहित आठ जनालाई यात्रा गर्ने अनुमति दिनु त्यस क्षेत्रका प्रहरी प्रशासनको गम्भीर लापरबाही हो भन्ने प्रष्टै छ ।
राष्ट्रिय जनमोर्चा आगामी दिनमा त्यस क्षेत्रमा सडक दुर्घटना न्यूनीकरण गर्न एकातिर, सडकको तत्कालै स्तरोन्नति गर्नुपर्ने आवश्यकतामा जोड दिन्छ भने अर्कोतर्फ, क्षमताभन्दा बढी यात्रु चढ्न नदिने सामान्य नियमलाई कडाइपूर्वक लागु गराउन हामी सम्बन्धित प्रहरी तथा प्रशासनको गम्भीर ध्यानाकर्षण गराउन चाहान्छौँ ।”
लु१ च६३४५ नम्बरको निजी कार स्वर्गद्वारी नगरपालिका–४ भिङ्ग्रिकोट सडकबाट तल खसेर दुर्घटना भएको थियो । कारमा यात्रा गरिसकेका आठै जनाको घटनास्थलमै मृत्यु भएको थियो ।
मृत्यु हुनेहरूमा दाङ लमही नगरपालिका–५ का कार चालक ताराबहादुर कुमाल, लमही–७ बस्ने वर्ष ४० को गोविन्द शाह, उनकी पत्नी वर्ष ३० की राधा नेपाली र छोरा वर्ष ९ को आदित्य शाह रहेको प्रहरीले जनाएको छ ।
प्रहरीका अनुसार तुल्सीपुर उपमहानगरपालिका–१५ बस्ने वर्ष ३५ की सरिता शर्मा पोख्रेल, उनका छोरा वर्ष १४ का विशाल पोख्रेल र वर्ष ९ का विकास पोख्रेल तथा घोराही उपमहानगरपालिका १५ का वर्ष ११ का शिशिर सुवेदीको पनि मृत्यु भएको जिल्ला प्रहरी कार्यालय प्युठानले जानकारी दिएको छ ।
