नयाँदिल्ली । मूल प्रवाह अखिल भारत नेपाली एकता समाजका अध्यक्ष ठाकुर खनालले साम्राज्यवादी देशहरूले विकासोन्मुख देशलाई उपयोग गरिरहेको बताउनुभएको छ ।
नेपाल सरकारले राष्ट्रघाती नागरिकता विधेयक पारित गरेको विधेयकमा जुन ४, २०२३ का दिन नयाँदिल्लीमा आयोजित सभालाई सम्बोधन गर्दै उहाँले यस्तो दाबी गर्नुभएको हो ।
‘साम्राज्यवादी शक्तिहरूले विश्वका विकासोन्मुख देशलाई आफ्नो अनुकूलतामा प्रयोग गर्दै गइरहेको छ’ उहाँले भन्नुभयो– ‘यस्तो परिस्थितिमा नेपाल सरकारले विदेशीलाई फाइदा पुग्ने गरी नागरिकता विधेयक पारित गरेर साम्राज्यवादी शक्तिलाई खुसी बनाउने काम गरेको छ ।’
मूल प्रवाह पश्चिमोत्तर क्षेत्रीय समितिद्वारा आयोजित उक्त सभालाई सम्बोधन गर्दै अध्यक्ष खनालले भारतको संसद् भवनमा सिङ्गो नेपाललाई नै गाभेर “अखण्ड” भारतको नाममा नक्सा झुन्ड्याउँदा नेपालको सार्वभौमिकतामाथि हमला भएको बताउनुभयो ।
उहाँले भन्नुभयो– ‘यसले छिमेकी देशसँगको मैत्रिसम्बन्धमा तिक्तता बढेको छ ।’
अध्यक्ष खनालले छिमेकी देशले छिमेकीको भूमिका निर्वाह गर्नुपर्नेमा हस्तक्षेपकारी भूमिका निर्वाह गर्नु अत्यन्तै निन्दनीय भएकाले त्यसको व्यापक विरोध गर्नु आवश्यक भएको बताउनुभयो ।
कार्यक्रमका समाजका केन्द्रीय सचिवालय सदस्य धनवीर पुन, केन्द्रीय सदस्य विक्रमसिंह राणा, बाबुराम विष्ट, केन्द्रीय सल्लाहकार विनबहादुर कुँवर, रामबहादुर गौतम, केन्द्रीय समता विभागका रामबहादुर विक, महिला विभागकी लक्ष्मी कडायत, सांस्कृतिक विभागका पहलसिंह परियारलगायतले आतिथ्य एवम् मन्तव्य राख्नुभएको थियो ।
कार्यक्रमको अध्यक्षता क्षेत्रीय समितिका अध्यक्ष शालिकराम आचार्यले र सञ्चालन क्षेत्रीय सचिव शिव केसीले गर्नुभएको थियो ।
क्षेत्रीय समितिका कोषाध्यक्ष रामप्रसाद घिमिरेले शब्दबाट तथा रक्तिमका कलाकारहरूले गीतमार्फत् स्वागत गर्नुभएको थियो ।
