खलङ्गा । राष्ट्रिय जनमोर्चा केन्द्रीय समितिको आयोजनामा अमेरिकी साम्राज्यवाद विरुद्ध सञ्चालित मेची–महाकाली अभियानको पश्चिमी टोलीले २०८० जेठ ११ गते बिहीबार प्युठान झिमरुक गाउँपालिकाको केन्द्र मच्छिबजारमा सभा सम्पन्न गरेको छ ।
सभालाई मुख्य वक्ताको रूपमा टोलीनेता राजमो केन्द्रीय उपाध्यक्ष तथा प्रवक्ता दुर्गा पौडेलले सम्बोधन गर्नुभएको थियोे ।
मन्तव्यको क्रममा उहाँले अमेरिकी साम्राज्यवाद विरुद्ध भण्डाफोर तात्कालिक राजनीतिक अवस्था रहेको बताउनुभयो ।
‘हामीले रहरले अमेरिकी साम्राज्यवादको विरोध गरेका होइनौँ’ उहाँले भन्नुभयो– ‘पछिल्लो समयमा भारतभन्दा पनि अगाडि बढेर नेपालमाथि प्रत्यक्ष हस्तक्षेपमा उत्रिएकाले हामीले अमेरिकी साम्राज्यवादको विरुद्ध आवाज उठाएका हौँ ।’
उहाँले देशको राष्ट्रियता, सार्वभौमिकता र भौगोलिक अखण्डताको रक्षाका लागि अमेरिकी साम्राज्यवादको विरोध गर्नैपर्ने बाध्यात्मक अवस्था उत्पन्न भएको बताउनुभयो ।
‘यदि हामीले अमेरिकी हस्तक्षेपलाई चुपचाप सहिरह्यौँ भने देशको अवस्था कस्तो होला ? तपाईंले कल्पना गर्न सक्नुहुन्छ’ उहाँले भन्नुभयो– ‘यदि नेपाली जनताले अमेरिकी हस्तक्षेपलाई रोक्न सकेनन् भने देश अफगानिस्तान, इराक र युक्रेनको अवस्थामा पुग्ने छ ।’
नेपाल अहिलेसम्म कसैको पनि प्रत्यक्ष उपनिवेश नबनेको इतिहास स्मरण गर्दै राजमोनेतृ पौडेलले अहिले अमेरिकी साम्राज्यवादका विरुद्ध पनि यस्तै उच्च वीरताका साथ अगाडि आउनुपर्ने बताउनुभयो ।
‘हामीले नेपाललाई चीन र अमेरिकामाझ युद्धको क्रिडास्थल बन्न दिनुहुँदैन’ उहाँले भन्नुभयो– ‘राष्ट्रिय जनमोर्चा नेपाली जनतासित आह्वान गर्न चाहान्छ, आउनुहोस् देश बचाऔँ, नेपालमाथिको अमेरिकी हस्तक्षेपलाई रोक्न जीवनमरणको सङ्घर्षका लागि तयार बनौँ ।
कार्यक्रममा नेकपा (मसाल) का लुम्बिनी प्रदेश प्रवक्ता तिलक जिसी, अखिल (छैठौँ) का केन्द्रीय अध्यक्ष देवेन्द्र कुँवर, अखिल नेपाल महिला सङ्घकी केन्द्रीय सचिव तारा जिसी र राजमो प्युठानका अध्यक्ष ज्ञामुराम न्यौपानेले पनि सम्बोधन गर्नुभएको थियोे ।
कार्यक्रमको सञ्ंचालन राजमो पालिका समितिका सचिव खिमबहादुर विकले गर्नुभएको थियो ।
अभियान टोली टोली आजै अर्घाखाँची प्रवेश गर्ने कार्यक्रम रहेको छ ।
