काठमाडौं । प्रतिनिधिसभा उपनिर्वाचन अन्तर्गत तनहुँ क्षेत्र नम्बर १ मा राष्ट्रिय स्वतन्त्र पार्टीका उम्मेदवार डा. स्वर्णिम वाग्लेले नेपाली कांग्रेसका उम्मेदवार गोविन्द भट्टराईभन्दा १० हजार मतान्तरले अग्रता लिएका छन् ।
पछिल्लो मतपरिणाम अनुसार ३० वटा वडाको ४३ हजार ७१ मत गणना हुँदा वाग्लेले २२ हजार २ ६० मत प्राप्त गरेका छन्।
उनलाई पछ्याइरहेका नेपाली कांग्रेसका उम्मेदवार गोविन्द भट्टराईले १२ हजार ९११ मत ल्याएका छन्। यस्तै, नेकपा एमालेका उम्मेदवार सर्वेन्द्र खनालले ६ हजार ५९३ मत ल्याएका छन्।
बारा–२ उपेन्द्रको अग्रता
बारा क्षेत्र नम्बर २ मा सत्ता गठबन्धनको तर्फबाट उम्मदेवार बनेका जनता समाजवादी पार्टीका अध्यक्ष उपेन्द्र यादवले अग्रता लिएका छन्।
जनमत पार्टीका उम्मेदवार शिवचन्द्र कुशवाहको अग्रता रोक्दै अघि बढेका यादवले पछिल्लो मतपरिणाम अनुसार २ हजा ९५४ मत प्राप्त गरेका छन्। अहिलेसम्म ७ हजार ६७२ मत गणना भएको छ।
सुरुवाती दुई नतिजामा अगाडि रहेका जनता समाजवादी पार्टी नेपालका अध्यक्ष उपेन्द्र यादव त्यसपछि दोस्रो नम्बरमा थिए।
तर अहिले फेरि उनले अग्रता अघि बढाएका छन्।
कलैयाको शिक्षा तालिम केन्द्रमा भइरहेको मतगणनाको पछिल्लो परिणामअनुसार कुशवाहा २ हजार ३०४ मत ल्याएर यादवलाई पछ्याइरहेका छन्।
उता नेकपा एमालेका पुरुषोत्तम पौडेल १ हजार ४ मतसहित तेस्रो स्थानमा छन्। रवि लामिछाने नेतृत्वको राष्ट्रिय स्वतन्त्र पार्टीका उम्मेदवार रमेश खरेलले ४०९ मत ल्याएका छन्। प्रभु साह नेतृत्वको आमजनता पार्टीका अरुण ज्ञवालीले २३१ मत ल्याइसकेका छन्।
चितवन–२ : इच्छाकामनामा रविलाई १७ सय बढीको अग्रता
चितवन–२ मा भइरहेको मतगणना अनुसार राष्ट्रिय स्वतन्त्र पार्टीका उममेदवार रवि लामिछानेले इच्छाकामना गाउँपालिकाबाट प्रतिस्पर्धीभन्दा १७ सय धेरै मत ल्याएर अग्रता लिएका छन् ।
रविले हालसम्म ४ हजार ३५८ मत पाएका छन्। उनका प्रतिस्पर्धी नेकपा एमालेका रामप्रसाद न्यौपानेले २ हजार ५८५ मत ल्याउँदा सत्ता गठबन्धनबाट नेपाली कांग्रेसका जीतनारायण श्रेष्ठले २ हजार २०५ मत ल्याएका छन्।
निर्वाचन अधिकृतको कार्यालयका अनुसार इच्छाकामना गाउँपालिकाका सबै वडाको मत गनिसकिएको छ। त्यहाँ आइतवार ९ हजार ४४४ मत खसेको थियो।
