काठमाडौं । राष्ट्रिय स्वतन्त्र पार्टीका सभापति रवि लामिछानेका गाडी चालक तीनतले घरको छतबाट खसेर गम्भीर घाइते भएका छन्।
सोमबार बिहान करिब ४ बजे भरतपुर महानगरपालिका–११ स्थित लामिछाने बसेको घरको छतबाट खसेका सवारी चालक दिलबहादुर थापा गम्भीर घाइते छन् ।
छतबाट खस्दा सिन्धुपाल्चोक बाह्रबिसे नगरपालिका–३ का ३९ वर्षीय शम्भु भन्ने दिलबहादुरको खुट्टा र टाउकोमा चोट लागेको जिल्ला प्रहरी कार्यालय चितवनका प्रवक्ता विजयराज पण्डितले बताए। थापाको घर सिन्धुपाल्चोक बाह्रबिसे नगरपालिका–३ हो।
गम्भीर घाइते भएको अवस्थामा थापालाई पुरानो मेडिकल कलेजमा भर्ना गरेर उपचार भइरहेको छ।
घटनाबारे अनुसन्धान गर्न प्रहरीले सोही पार्टीका महामन्त्री एवम् प्रवक्ता मुकुल ढकालका सवारी चालकलाई पक्राउ गरेको छ।
सँगै सुतेका रास्वपाका प्रवक्ता मुकुल ढकालका सवारी चालक कालुराम राजवंशीलाई नियन्त्रणमा लिएर सोधपुछ गरिरहेको प्रहरीले जनाएको छ ।
