अर्घाखाँची । राष्ट्रिय जनमोर्चाका अध्यक्ष चित्रबहादुर केसी यही वैशाख ८ गते अर्घाखाँची आउनु हुने भएको छ । वैशाख ८ र ९ गते सन्धिखर्कमा हुन लागेको राष्ट्रिय जनमोर्चा अर्घाखाँचीको पाँचौं जिल्ला सम्मेलनलाई उद्घाटन गर्न अध्यक्ष केसी अर्घाखाँची आउन लाग्नुभएको हो ।
राष्ट्रिय अखण्डता र जनताको पक्षमा खरो बोल्ने बामपन्थी नेता केसी जिल्ला आउने भएपछि राजमोका नेता, कार्यकर्ता मात्रै नभइ उहाँका शुभचिन्तकहरुसमेत उत्साहित भएको बताइएको छ ।
मुलुकमा रहेको राजनीतिक अस्थिरता, कमजोर राष्ट्रियता र संकटग्रस्त आर्थिक अवस्थाको निराकरण गर्न संघीयता खारेजीको विकल्प नभएको जिकिर गर्दै आउनुभएका अध्यक्ष केसीले राजमो अर्घाखाँँचीको वैशाख ८ गते हुने ५ औं जिल्ला सम्मेलनलाई सम्बोधन गर्नुहुने अध्यक्ष थम्मन केसीले जानकारी दिनुभएको छ ।
नयाँ नेतृत्व र कार्यक्रम तय गर्नको निम्ती जिल्ला सम्मेलन गर्न लागेको राष्ट्रिय जनमोर्चाले मिति नजिकिएसँगै तयारीलाई पनि तिब्र पारेको सचिव बाबुराम पन्थीले बताउनुभयो ।
जिल्लाका सबै वडा र पालिकामा बैठक, भेला र सम्मेलन मार्फत वडा तथा पालिकास्तरीय समिति गठन सकिसकेको राजमोले अहिले जिल्ला सम्मेलनमा सहभागी हुने प्रतिनिधि, पर्यवेक्षक र दर्शक छनौटको कामलाई तीब्र पारेको जिल्ला उपाध्यक्ष गोपाल पौडेलले जानकारी दिनुभयो।
८ गते उद्घाटन भइ ९ गते बन्दशत्र मार्फत नयाँ नेतृत्व र कार्यक्रम तय गरि समापन हुने सम्मेलनमा जिल्लाभरबाट करिब ५ सय प्रतिनिधि र पर्यवेक्षक सहभागी हुने राजमो अर्घाखाँचीले जनाएको छ ।
