– विष्णु शर्मा ##
सरकारमा सधैँ झगडा चल्छ कुर्सीलाइ लिएर
गरिबका दिन बित्छन् सधैँ आँसु नै पिएर ।
जनतालाई बनाई बलियो सिढी पुग्दछन् सत्तामा
लक्ष्य पूरा हुन्छ बिर्सन्छन् बाचा भुल्दछन् भत्तामा ।।

जनताका आधारभूत समस्या हँुदैनन् समाधान
उद्धार उनको होला भन्दा झन् हुन्छ अपमान ।
मिटरब्याजपीडित जनसमुदाय दिनरात रुँदै छन्
पीडकको दबाबले दिनहुँजसो आत्महत्या हँुदै छन् ।।

महङ्गी बढ्छ मारमा पर्छौ निमुखा जनता
लोकतन्त्रको पनि गलाहरू रेट्दै छन् अब त ।
विरुद्धमा नारा लगायो कि त थुन्दिन्छन मुखहरू
तानाशाहीले कसरी दिन्छन् जनतालाई सुखहरू ?

देशको उपराष्ट्रपति चुने संविधान विपरीत
विधिको गला रेट्नेबाट हुने छैन नारीको हकहित ।
सवारी साधनमा टेक्ने ठाउँ हुन्न मूल्य छ मनपरी
सरकारले नियमन नगर्दाखेरि बेथिति झन् बढी ।।

सडक पनि उपर्युक्त छैनन् दुर्घटना भइरहन्छ
दिनदिनै नागरिकको ज्यान अनाहकमा गइरहन्छ ।
राज्यबाट सडकलाई हुन्छ बजेट निकास
रकम जान्छ भ्रष्टाचारमा हँुदैन विकास ।।

बजार जाँदा सामानको हुन्छ मूल्यमा मनपरी
आकाशिँदो छ मूल्य त्यसमाथि पीडा मनभरि ।
देशभरिका किसानहरू छन् सधैँ मारमा
बिचौलियाको बिगबिगीले पर्दछन् भारमा ।।

लगानीसम्म उठ्दैन उनको के गरी खाने हो ?
नाजवाफ सधैँ देशको सरकार माग्न कहाँ जाने हो ?
समयमा दिन्न मल र बिउ कट्दै जान्छ सिजन
कृषिप्रधान देशको कृषिप्रति केही छैन भिजन ।।

रोजगारमा पावर चल्छ मिल्दैन जागिर
बहिर्गमन हुन्छन् युवायुवती बाध्यताले बाहिर ।
कतिपय जिल्लामा फेरि उपनिर्वाचन हुँदै छ
दलले समृद्धिका नारा लिई गाउँ गाउँमा पुग्दै छ ।।

उधारा हुन् धेरैजसो नारा नपत्याऊ जनता
आफ्नो अभिमत सही ठाउँमा लगाऊ अब त ।
भ्रष्टाचारमुक्त देश बनाउने हो मनमा लिऊँ है
गलत कामको भण्डाफोर गर्नेलाई मत दिउ है ।।

खबरदार धमिलो पानीमा माछा मार्ने जुक्ति लाउँदै छन्
साम्राज्यवादका एजेन्टहरू घरआँगन आउँदै छन् ।
राजनीति भन्या जनताको सेवा भनेरै आ’का छन्
स्वदेशमा बसी साम्राज्यवादको जागिर खा’का छन् ।।

अमूल्य छ यो हाम्रो मत लापरबाही नगरौँ
गिलास रोजी मतदान गरौँ हल्लामा नलागौ ।
अहिलेसम्म कुनै दाग छैन है गिलास चिह्नमा
गलत गर्ने जनमोर्चा भन्दा डराउँछन् देशमा ।।

कुनै विषयलाई विश्लेषण गर्छ दूरदर्शी भएर
गलत कामको भण्डाफोर गर्छ संसद्मा गएर ।
छोटो बनाऊ विकासका मूलहरू फुटाउने समय
एकचोटि हेरौँ जनमोर्चालाई गराई विजय ।।