काठमाडौं । नेकपा (मसाल) का प्रवक्ता रामप्रकाश पुरीले जनताले रगतसँग साटेर ल्याएका उपलब्धि उल्ट्याउन षडयन्त्र भइरहेको बताउनुभएको छ ।
चैत २४ गतेका अवसरमा शुक्रबार राष्ट्रिय जनमोर्चाले काठमाडौंमा आयोजना गरेको जनआन्दोन दिवसको कार्यक्रममा बोल्दै प्रवक्ता पुरीले २०६२÷०६३ सालको जनआन्दोलनका उपलब्धि गुम्ने खतरा बढेको बताउनुभयो ।
पुरीले लोकतान्त्रिक गणतन्त्र उल्ट्याउन राजावादीहरु फेरि सक्रिय हुन थालेकोमा सचेत गराउनुभयो । ‘जनताले रगतसँग साटेर ल्याएको परिवर्तनमाथि विदेशी शक्तिले समेत आँखा गाडिरहेका छन्’ प्रवक्ता पुरीले भन्नुभयो, ‘एकातिर देशभित्रैका प्रतिगामी तत्व र अर्कातिर विदेशी साम्राज्यवादीबाट समेत नेपालको परिवर्तन विरुद्ध हमला भइरहेको छ ।’
उहाँले संघीयताका कारण मुलुकको अर्थतन्त्रसँगै राष्ट्रियता पनि खतरामा परेकोले खारेजीको गर्नुको विकल्प नरहेको स्पष्ट पार्नुभयो ।
कार्यक्रममा बोल्दै राष्ट्रिय जनमोर्चाका केन्द्रीय सल्लाहकार तथा राष्ट्रिय सभा सदस्य राजेश विकले सत्तासीन दलहरुकै कारण जनताले कठिन संघर्षबाट प्राप्त उपलब्धि गुम्ने खतरा रहेको बताउनुभयो । उहाँले मिटरब्याज पीडितको समस्याप्रति सरकार जिम्मेवार हुन नसकेको आरोप पनि लगाउनुभयो ।
कार्यक्रममा बोल्दै अखिल नेपाल कानुन व्यवसायी संघ (अन्ला) का महासचिव लक्षमणदेव पाण्डेले ऐतिहासिक जनआन्दोलनको उठानबारे स्मरण गर्नुभयो । उहाँले परिवर्तनका हरेक आन्दोलनमा राष्ट्रिय जनमोर्चाले खेलेको भूमिकाबारे स्पष्ट पार्नुभयो । हाल गणतन्त्र रक्षाका लागि राजमोले लिएको नीति २०४६ र ०६२/६३ सालकै स्प्रिट रहेको बताउनु भयो ।
कार्यक्रममा अखिल (छैठौं) का केन्द्रीय सचिव तथा त्रिभुवन विश्वविद्यालय केन्द्रीय क्याम्पसका स्ववियु सदस्य पुरन पोख्रेलले जनआन्दोलनमा बाँडिएका सपनालाई सत्तासिन दलहरूले छोडेकोप्रति आक्रोश व्यक्त गर्नुभयो ।
युवा विद्यार्थी, किसान, मजदुर, महिला वर्गको हितमा सत्तासिन दलहरू गैरजिम्मेवार बनेका कारण गणतन्त्रमाथि खतरा बढिरहेको बताउनुभयो । गणतन्त्रप्राप्ति पछि पनि जनताले अधिकार प्राप्तिको लागि लडिरहनु पर्ने बिडम्बनाविरुद्ध समेत आफूहरुले निरन्तर संघर्षरत रहने बताउनुभयो । उहाँले शहिद, घाइते, बेपत्ता र आन्दोलनमा सरिक सबैको उचित सम्मान र व्यबस्थापन हुनुपर्नेमा जोड दिनुभयो ।
राष्ट्रिय जनमोर्चा केन्द्रीय कार्यक्रम अन्तर्गत काठमाडौं जिल्ला समितिको आयोजनामा रत्नपार्कस्थित शान्तिबाटिकामा सो कार्यक्रम भएको हो । राजमो जिल्ला अध्यक्ष झबिन्द्र बेलवासेको अध्यक्षतामा भएको कार्यक्रमको सञ्चालन सचिव छवि खनालले गर्नुभएको थियो भने स्वागत अखिल नेपाल महिला संघका कोषाध्यक्ष रितु केसीले गर्नुभएको थियो।
नेकपा (मसाल) ले २०४६ साल चैत २४ गते जनआन्दोलन उत्कर्षमा पुगेको स्मृतिमा हरेक वर्ष चैत २४ लाई जनआन्दोलन दिनवसका रुपमा मनाउने गर्दछ । कार्यक्रमको बिच बिचमा रक्तिम सास्कृतिक अभियानका कलाकारहरुले जनवादी गीत तथा नृत्य प्रस्तुत गरेका थिए।
जनआन्दोलन दिवसका अवसरमा आज जनमोर्चाले विभिन्न जिल्लामा कार्यक्रम गरेको छ ।
