काठमाडौं । काठमाडौंको बूढानीलकण्ठ १० बालुवाखानीस्थित फेरिल्याण्ड इन्टरनेशनल स्कूलले वार्षिक क्रियाकलाप अन्तर्गत पहिलो चरणको पुरस्कार वितरण गरेको छ । सोमबार विद्यालयमा आयोजित समारोहमा कक्षा ३ सम्मका विद्यार्थीलाई पुरस्कृत गरिएको हो ।
काठमाडौं प्याब्सनका वरिष्ठ उपाध्यक्ष नवराज भट्टले प्ले ग्रुप, नर्सरी, एलकेजी, यूकेजी तथा कक्षा १, २ र ३ मा अध्ययनरत विद्यार्थीलाई विभिन्न विधामा पुरस्कार प्रदान गर्नुभयो ।
कार्यक्रममा प्रमुख अतिथि भट्टले खेल र शिक्षालाई जोडेर अगाडि बढिरहेको फेरिल्याण्ड स्कूल प्याब्सन भित्रको एक उत्कृष्ट विद्यालय रहेको बताउनुभयो ।
विद्यालयका प्रिन्सिपल विष्णुचन्द्र अधिकारीले २१ औँ शताब्दीमा चाहिने जनशक्ति उत्पादनतर्फ विद्यालय अगाडि बढेको उल्लेख गर्दै यसमा अभिभावकहरुको विशेष भूमिका रहने धारणा व्यक्त गर्नुभयो ।
विद्यालयका निर्देशक विनोद अधिकारीले सञ्चालन गर्नुभएको कार्यक्रममा स्वागत निर्देशक रामप्रसाद गौतमले गर्नुभएको थियो ।
विद्यालयले दोश्रो चरणको पुरस्कार वितरण बूढानीलकण्ठ १० का वडाअध्यक्ष एवम् नगर प्रवक्ता नवराज भट्टराईको प्रमुख आतिथ्यमा मंगलबार आयोजना गर्ने जनाएको छ ।
विद्यालयले शैक्षिक गतिविधिका अतिरिक्त खेलकुद, गीतसंगीतलगायत अतिरिक्त क्रियाकलापमा जोड दिइएको जनाएको छ ।
