काठमाडौं । अर्थविद् डा. स्वर्णिम वाग्लेले नेपाली कांग्रेस परित्याग गरेको घोषणा गर्नुभएको छ । उहाँले बिहीबार नेता डा. शेखर कोइरालालाई सन्देश पठाएर पार्टी परित्यागको घोषणा गर्नुभएको हो ।
वाग्लेले सभापति शेरबहादुर देउवाको निरन्तर हेपाइ र अपमानले पार्टी परित्याग गर्ने अवस्था सिर्जना भएको सन्देशमा उल्लेख गर्नुभएको छ ।
‘प्रिय दाइ, हजुरहरुको अपार सद्भावका बावजूद म कांग्रेसमा रहन नसक्ने अवस्था आएको छ,’ उहाँले लेख्नुभएको छ, ‘देउवा–आरजु गिरोहको निरन्तर हेपाइ र अपमानले यो स्थिति ल्याएको हो ।’
नेता कोइरालालाई पठाएको सन्देश महामन्त्रीहरु गगन थापा, विश्वप्रकाश शर्मालाई पनि पठाएको बताइएको छ ।
रास्वपाबाट उपचुनाव लड्ने तयारी
कांग्रेस छोडेका अर्थविद् वाग्लेले राष्ट्रिय स्वतन्त्र पार्टीबाट तनुहँ–१ मा उपनिर्वाचन लड्ने तयारी गरिहेको चर्चा छ । त्यसका लागि वाग्लेले राष्ट्रिय स्वतन्त्र पार्टीका पदाधिकारीसँग छलफल गरिरहेको स्रोतले जनाएको छ ।
वाग्लेले आजै रास्वपामा प्रवेश गर्ने र उम्मेदवारी घोषणा गर्ने सम्भावना रहेको रास्वपाका एक नेताले बताए ।
वाग्ले यसअघि आम निर्वाचनमा चितवनबाट चुनाव लड्ने आकांक्षा देखाएपनि टिकट नपाएपछि असन्तुष्ट हुनुहुन्थ्यो ।
