धनगढी । राष्ट्रिय जनमोर्चाले देशब्यापी रुपमा सञ्चालन गर्न लागेको एक महिने संगठनात्मक अभियान सुदूरपश्चिमका विभिन्न जिल्लामा सुरु गरिएको छ । सुदूरपश्चिम प्रदेशका कैलाली, कञ्चनपुर, डोटी, डडेल्धुरा, बैतडी र दार्चुला जिल्लामा अभियानको सुरुवात गरिएको राजमो केन्द्रीय सदस्य एवं सुदूरपश्चिम इन्चार्ज मनोज भट्टले जानकारी दिनुभएको छ ।
अभियान अन्तर्गत कञ्चनपुरमा कृष्णपुर नगरपालिकाको गुलरियामा सभा आयोजना गरिएको छ । सभालाई राजमो केन्द्रीय सदस्य मनोज भट्टसहित कञ्चनपुर जिल्ला अध्यक्ष रामबहादुर कार्की, नेकपा (मसाल) कञ्चनपुरका प्रवक्ता लक्ष्मीदत्त बडु, जातीय समता समाजका महासचिव गोविन्द विक, मजदुर नेता जनक कुवँर, राजमो जिल्ला सदस्य गौरा सार्की, दयाराम अधिकारीलगायतले सम्बोधन गर्नुभएको छ ।
यता, कैलालीमा गोदावरी नगरपालिकाको बान्द्रेखालबाट जिल्लास्तरको अभियान सुरुवात हुँदैछ भने धनगढी उपमहानगरको अभियान कैलाली गाउँबाट बिहान ८ बजे सभा गरी सुरुवात गरिएको छ ।
राजमो केन्द्रीय सदस्य एवं सुदूरपश्चि प्रदेश अध्यक्ष नन्दराज भट्टले उद्घाटन गर्नुभएको कार्यक्रममा राजमो जिल्ला सचिव जगत जोशी, जनजाती सम्मेलनका केन्द्रीय कोषाध्यक्ष खडक राना, राजमो धनगढी नगर सदस्य चन्द्रबहादुर विष्ट, रामकृष्ण राना लगायत नेताहरुले सम्बोधन गर्नुभएको थियो ।
कैलालीको टिकापुर क्षेत्रको अभियान दुर्गौलीबाट सुरु गरिँदैछ भने, गौरिगंगाको कुचैनीमा पनि बेग्लै अभियान सञ्चालन गर्न लागिएको नेता भट्टले जानकारी दिनुभयो ।
डोटी जिल्लाको अभियान जोरायलको खसरेस्थित केदार माविबाट सञ्चालन गर्न लागिएको राजमो डोटीका सचिव केशवनाथ योगीले जनाउनुभएको छ ।
यस्तै, डडेल्धुराको अभियान जोगबुडाबाट सुरु गरिँदैछ ।
