टेकराज भुसाल, अर्घाखाँची ।
अर्घाखाँचीको भूमिकास्थान नगरपालिका १ र २ को ढाकावाङ्गमा तेस्रो पिपलनेटा खुल्ला भलिबल प्रतियोगिता शुक्रबारदेखि सुरु भएको छ।
पिपलनेटा बजार विकास संस्था भूमिकास्थान नगरपालिका १ र २ को आयोजनामा सुरु भएको तेस्रो पिपलनेटा खुल्ला भलिबल प्रतियोगिताको भूमिकास्थान नगरपालिकाका नगरप्रमुख झविलाल थापाले उद्घाटन गर्नुभएको हो ।
सो क्रममा नगरप्रमुख थापाले खेलकुदले मानिसलाई अनुशासनमा राख्ने र भविष्यका राष्ट्रिय तथा अन्तर्राष्ट्रिय स्तरका खेलाडी उत्पादन हुने भएकाले भूमिकास्थानले खेलकुदलाई प्राथमिकता दिएको बताउनुभयो ।
केही दिन पहिला सम्पन्न भएको १२ औं राष्ट्रपति रनिङ शिल्ड प्रतियोगिताको उपाधी भूमिकास्थानले हात पारेको र अन्डर १९ विश्वकप क्रिकेट प्रतियोगितामा भूमिकास्थान नगरपालिकाका २ जना खेलाडी सहभागी मध्य १ जना कप्तान समेत भएकोमा खुसी व्यक्त गर्दै नगरप्रमुख थापाले खेलकुदलाई विद्यालयको तल्लो तहबाटै प्राथमिकता दिए विद्यार्थीहरुको सिर्जनात्मक अभ्यास बढ्ने र सामाजिक सन्जालको दुरुपयोगमा पनि कमी आउने बताउनुभयो ।
कार्यक्रममा नगरउपप्रमुख बालाकृष्ण बन्जाडे, प्रमुख जिल्ला अधिकारी मिना अर्याल लगायतले कार्यक्रम सफलताको शुभकामना दिनुभएको थियो।
कार्यक्रम पिपलनेटा बजार विकास संस्थाका उपाध्यक्ष बाबुराम खनालको अध्यक्षता, विष्णु शर्माको सञ्चालन, जीवन नेपालीको स्वागतमा सम्पन्न भएको थियो।
फागुन २२ गतेसम्म सञ्चालन हुने प्रतियोगितामा विजेताले रू. ७१ हजार शिल्ड, मेडल र प्रमाणप्रत्र प्राप्त गर्नेछ । त्यस्तै, उपविजेता र तृतीय स्थान हासिल गर्ने टिमले क्रमश रु ५१ हजार र ३१ हजार नगद सहित शिल्ड, मेडल र प्रमाणप्रत्रको व्यवस्था गरिएको आयोजकले जनाएको छ।
