काठमाडौं । राष्ट्रिय जनमोर्चाका उपाध्यक्ष दुर्गा पौडेलले संविधानको रक्षाका लागि नेपाली कांग्रेसका नेता रामचन्द्र पौडेललाई राष्ट्रपतिमा मतदान गर्ने स्पष्ट पार्नुभएको छ ।
बिहीबार आठ राजनीतिक दलद्वारा काठमाडौंमा आयोजित सांसदहरुका लागि अभिमुखीकरण कार्यक्रमममा उपाध्यक्ष पौडेलले आठदलीय गठबन्धनले प्रतिगमनलाई पराजित गर्न तथा राष्ट्रियता, गणतन्त्र र धर्मनिरपेक्षताको रक्षा गर्ने विश्वास व्यक्त गर्नुभयो ।
‘गणतन्त्र, धर्मनिरपेक्षता र राष्ट्रियता रक्षा तथा प्रतिगमनविरुद्ध बनेको ५ दलीय गठबन्धन भत्किएको थियो । अहिले फेरि ८ दलीय गठबन्धन बनेको छ’ उहाँले भन्नुभयो, ‘यो गठबन्धन गणतन्त्र, धर्मनिरपेक्षता र राष्ट्रियता रक्षाको लागि एकजुट भएको छ ।’
उहाँले आफ्नो पार्टी राष्ट्रिय जनमोर्चाले रामचन्द्र पौडेललाई मतदान गर्ने निर्णय गरिसकेको पनि जानकारी दिनुभयो ।
उहाँले भन्नुभयो, ‘प्रतिगमनविरुद्ध राष्ट्रपतिको निर्वाचनमा नेपाली कांग्रेसका उम्मेदवार रामचन्द्र पौडेलले उमेदवारी दिनुभएको छ । उहाँलाई मतदान गर्नको लागि राष्ट्रिय जनमोर्चा पार्टीभित्र निर्णय गरिसकेको छ ।’
राष्ट्रपतिमा रामचन्द्र पौडेललाई विजयी गराउन सबै दलका सांसदलाई आह्वान गर्दै नेत्री पौडेलले अग्रिम शुभकामना पनि दिनुभयो ।
सो कार्यक्रममा प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा (एकीकृत समाजवादी) का अध्यक्ष माधवकुमार नेपाल लगायत नेताहरुले सम्बोधन गर्नुभएको थियो ।
राष्ट्रपतिको निर्वाचन यही फागुन २५ मा हुँदैछ । नेपाली कांग्रेसका वरिष्ठ नेता रामचन्द्र पौडेललाई आठ दलको समर्थनमा राष्ट्रपतिको उम्मेदवार बनाइएको छ भने नेकपा (एमाले) ले सुवाशचन्द्र नेम्वाङलाई आगाडि सारेको छ ।
