क्वालालम्पुर । मलेसियामा फेरि भिषण बाढी आएको छ । बाढीबाट कार बगाउँदा बिहीबार बिहानसम्म बाढीबाट एक जनाको मृत्यु भएको उद्धारकर्ताहरूले बताएका छन् ।
दक्षिणी जोहोर राज्य र छिमेकी सिङ्गापुर सबैभन्दा बढी प्रभावित भएका छन् । बाढीबाट गाउँसहर जलमग्न भएका छन् । उद्धारकर्ताले घरको छतबाट पीडितलाई सुरक्षित स्थानमा पुर्याएका छन् । त्यस क्रममा हालसम्म २६ हजारभन्दा बढीलाई सुरक्षित स्थानमा स्थानान्तरण गरिएको छ ।
बुधवारको अविरल वर्षाले समस्या थपिएको छ । देशका पाँच राज्य बाढीको चपेटामा परेका छन् । सरकारी अधिकारीका अनुसार विद्यालय र सामुदायिक भवनमा पीडितलाई सारेर राहतका कार्यक्रम सञ्चालन गरिएको छ ।
गत नोभेम्बरमा बाढीबाट पीडित भएको मलेसियामा पुन: बाढीले जनजीवन तहसनहस पारेको छ । मौसम विज्ञान विभागले आगामी अप्रिलसम्म वर्षा हुने जनाउँदै सबैलाई सचेत र सतर्क रहन आह्वान गरेको छ । जोहोर राज्यका सडक जलमग्न भएका छन् । केहीमा क्षति पनि भएको छ ।
सामाजिक सञ्जालमा पोस्ट गरिएका तस्बिरमा सवारी साधन, घर र पसल डुबेका देखिन्छन् । राष्ट्रिय बाढीप्रकोप नियन्त्रण निकायले पोस्ट गरेका तस्बिरमा बच्चालाई बाल्टिनमा बोकेर सुरक्षित स्थानमा लगिएको देखिन्छ ।
देशका २५ नदीमा पानीको सतह खतराको तहमा पुगेको उक्त निकायले जनाएको छ । भारी वर्षाका कारण हालसम्म एक सय दुई स्थानमा पटक पटक पहिरो गएको छ । (रासस/एपी)
