काठमाडौं । अखिल नेपाल राष्ट्रिय स्वतन्त्र विद्यार्थी युनियन (छैठौं) ले आगामी चैत १ देखि ५ गतेसम्म सञ्चालन गर्न लागेको संघीयता विरुद्ध विद्यार्थी मार्च व्यवस्थापनको तयारी सुरु गरेको छ । उपत्यकामा तयारीको लागि परिचालन समिती गठन गरि तयारीका कामहरुलाई तिब्रता दिइएको छ ।
शनिबार बसेको काठमाडौं मार्च उपत्यका परिचालन समितिको बैठकले व्यवस्थापनका विभिन्न पक्षबारे छलफल गरेको संयोजक सुवाश जिसीले जानकारी दिनुभयो ।
संयोजक जिसीका अनुसार बैठकमा मार्चको तयारीको सन्दर्भमा उपत्यकामा भएका हालसम्मका कार्यहरुको समिक्षा भएको थियो । आर्थिक व्यवस्थापनको लागि समितीले विभिन्न क्षेत्रको विभाजन गरि सहयोग संकलनको कामलाई अगाडि बढाएको छ ।
काठमाडौमा आउने हजारौं विद्यार्थी तथा सहभागीहरुलाई खान र बस्नको लागि व्यवस्था गर्न आवस्यक तयारीको लागि परिचालन समितिले काम गरिरहेको छ । वैठकले क्याम्प राख्ने ठाउँहरु पहिचान गर्ने र वुकिङ गर्ने समेत निर्णय गरेको छ ।
बैठकले परिचालन समितिका केहि सदस्यहरुलाई थप जिम्मेवारी दिएको छ । बैठकमा परिचालन समितिका सदस्यहरुका साथै युनियनका केन्द्रीय अध्यक्ष विमल पोख्रेल उपस्थित हुनुहुन्थ्यो।
