काठमाडौं । नेत्ररोग विशेषज्ञ डा. सन्दुक रुइत बहराइन राजाबाट सम्मानित भएका छन् । बहराइन सरकारका तर्फबाट राजा हमाद बिन इसा अल खालिफाले मंगलबार डा. रुइतलाई प्रतिष्ठित इशा अवार्ड प्रदान गरेका छन्।
उनलाई ‘इशा अवार्ड फर सर्भिस टु ह्युमानिटी’ संस्थाले १० लाख अमेरिकी डलर (नेपाली १३ करोड रुपैयाँबढी) को अवार्ड प्रदान गरेको हो ।
बहराइन सरकारका तर्फबाट राजधानी मनामास्थित इशा सांस्कृतिक केन्द्रमा आयोजित विशेष समारोहमा राजा खालिफाले डा. रुइतलाई अवार्ड प्रदान गरेका हुन्।
तिलगंगा आँखा प्रतिष्ठानका कार्यकारी निर्देशक डा. रुइतले अन्धोपना निवारणमा गरेको योगदान बापत बहराइन सरकारले यो विशिष्ट सम्मान प्रदान गरेको हो।
बहराइनका राजा हमाद बिन इसा अल खालिफाले रुइतलाई उक्त अवार्ड हस्तान्तरण गर्दै डा. रुइतले आँखा सेवामा निकै अमूल्य मानवीय सेवाको सर्वोउत्कृष्ट काम गरेको बताए।
३० वर्षभन्दा बढी नेत्र विशेषज्ञका रुपमा काम गरिसकेका उनले कम रकममै शल्यक्रिया र प्रतिगोटा तीन डलरभन्दा कम मूल्यमै पाउन सकिने उच्च गुणस्तरको इन्ट्राओकुलर लेन्स निर्माण गर्ने केन्द्रहरू स्थापना गरे।
वर्षौंदेखि डा. रुइतले चीन, भारत, बंगलादेश, कम्बोडिया, उत्तर कोरियालगायत अन्य ठाउँमा आँखा शिविर सञ्चालन गरिसकेका छन्।
डा. रुइतले ५० हजारभन्दा बढी विपन्न नागरिकका आँखाको निःशुल्क शल्यक्रिया गरिसकेका छन्।
डा. रुइतले यसअघि सन् २००६ मा रोमन म्यागसेसे पुरस्कार, सन् २०१८ मा भारत सरकारले दिने पद्मश्री सम्मानबाट सम्मान, २०७५ मा नेपालमा प्रधानमन्त्री राष्ट्रिय प्रतिभा पुरस्कार र २०७७ मा सुप्रसिद्ध प्रबल जनसेवाश्री पदक पाइसकेका छन्।
