धनगढी । नेकपा (मसाल) र क्रान्तिकारी माओवादीसहित नौ राजनीतिक दलले शुक्रबार सुदूरपश्चिम प्रदेशको धनगढीमा पनि जनप्रदर्शनसहित विरोध सभा गरेका छन् । नौ दलले देशब्यापी आयोजना गरेको संयुक्त विरोध प्रदर्शन अन्तर्गत धनगढीमा बृहत प्रदर्शन गरिएको हो । क्याम्पस रोडबाट सुरु भएको विरोध याली पार्कचोकमा आएर सभामा परिरणत भएको थियो । सभालाई नौ वटै राजनीतिक दलका नेताहरुले सम्बोधन गर्दै एमसीसीको खारेजी र सीमा अतिक्रमण विरुद्ध नेपाल सरकार तथा भारतलाई खबरदारी गरे ।
कार्यक्रममा राष्ट्रिय जनमोर्चाका केन्द्रीय सदस्य तथा सुदूरपश्चिम इन्चार्ज मनोज भट्टले एमसीसी स्वीकार गरेर ओली सरकारले देशलाई साम्राज्यवादी कित्तामा लैजान खोजेको आरोप लगाउनुभयो । उहाँले हाम्रो पञ्चशीलको सिद्धान्त र असंलग्न परराष्ट्र नीति विपरित देशमा साम्रज्यवादी सैनिकको चलखेललाई सरकारले निम्तो दिएको दाबी गर्नुभयो ।
यस्तै, नेता भट्टले भारतले नेपालको भूमि मिचेर आफ्नो नक्सामा सामेल गर्नु चानचुने कुरा नभएको बताउनुभयो । आफ्नो भूमि फिर्ता गरेर आफ्नो अखण्डताको रक्षा गर्न नेपाली जनता तयार हुनुपर्ने उहाँले बताउनुभयो । आफ्नो भूमीको रक्षाका लागि अन्तर्राष्ट्रिय अदालत जान वा जे सुकै गर्न पनि नेपाली जनता र सरकार तयार हुनुपर्ने उहाँको भनाई छ ।
सभालाई नेकपा (क्रान्तिकारी माओवादी)का केन्द्रीय सदस्य राम बहादुर केसी, नेकपा (माओवादी केन्द्र)का उपाध्यक्ष रंगनाथ ढकाल, नेपाल कम्युनिष्ट पार्टीका केन्द्रीय सचिवालय सदस्य हरिकृष्ण भट्ट, देजमो नेपालका केन्द्रीय सदस्य बिष्णु दमाई, नेकपा (मसाल)कैलालीका प्रवक्ता मिलन शाही लगायत नेताहरुले सम्बोधन गर्नुभएको थियो ।
राष्ट्रिय जनमोर्चाका केन्द्रीय सदस्य तथा सुदूरपश्चिम प्रदेश अध्यक्ष नन्दराज भट्टको अध्यक्षता, नेकपा (माओवादी केन्द्र)का पीवीएम लोकराज जैसीको सञ्चालन तथा क्रान्तिकारी माओवादीका प्रदेश सचिव राम महराले स्वागत गर्नुभएको कार्यक्रममा नेकपा (माले)का केन्द्रीय सदस्य परेक रावलले धन्यवाद ज्ञापन गर्नुभएको थियो ।
