सुर्खेत । राष्ट्रिय जनमोर्चाका महासचिव जनकराज शर्माले नेपालमा अमेरिकी मिलेनियम च्यालेञ्ज कोअपरेसन (एमसीसी) लागू भए नेपालको संविधान नै निस्क्रिय हुने चेतावनी दिनुभएको छ । शुक्रबार सुर्खेतमा नौ दलले आयोजना गरेको एमसीसी र सीमा अतिक्रमण विरुद्ध बोल्दै महासचिव शर्माले एमसीसी नेपालका लागि अभिषाप भएको बताउनुभयो ।
बिरोध सभालाई नेकपा (क्रान्तिकारी माओवादी) का स्थायी कमिटी सदस्य रामसिंह श्रीस, सोही दलका कर्णाली प्रदेशका इन्चार्ज चक्रपाणी शर्मा, नेकपा (माओवादी केन्द्र)का पीवीएम नरेश शाही, नेकपा (माले) का केन्द्रीय सदस्य बलबहादुर गिरी, राष्ट्रिय जनमोर्चा कर्णाली प्रदेशका अध्यक्ष भरत बहादुर शाही, नेकपा (मसाल) का सुर्खेत जिल्ला प्रवक्ता मोहन थापालगायत नेताहरुले सम्बोधन गर्नुभएको थियो ।
मंगलगढि चोकबाट सुरूभएको जुलुस पिपलचौतारीमा पुगेर बिरोध सभामा परिणत भएको थियो । सभाको बिच–बिचमा रक्तिम कलाकारहरूले जनवादी गित र नृत्य प्रस्तुत गर्नुभएको थियो ।
सभाको अध्यक्षता नेकपा (क्रान्तिकारी माओवादी) का कर्णाली प्रदेश संयोजक दिपक बहादुर शाही र सञ्चालन राजमो कर्णाली प्रदेशका सदस्य अम्बर बहादुर नेपाली तथा स्वागत नेकपा मालेका प्रदेश सदस्य एम बहादुर थापालेले गर्नुभएको थियो । आज नेकपा (मसाल) सहित नौ दलले एमसीसी र सीमा अतिक्रमण विरुद्ध सातवटै प्रदेशमा जनप्रदर्शन तथा विरोध सभा गरेका छन् ।
