काठमाडौं । प्रमुख प्रतिपक्षीदल नेपाली कांग्रेसको अवरोधका कारण प्रतिनिधि सभाको बैठक प्रभावित भएको छ । अख्तियार दुरुपयोग अनुसन्धान आयोगले तात्कालिन पूर्व प्रधानमन्त्री माधवकुमार नेपालको समयमा भौतिक योजना तथा निर्माण मन्त्रीको कार्यभार सम्हालेका बिजयकुमार गच्छदारलाई बालुवाटार जग्गा प्रकरणमा संलग्न बनाई राजनीतिक पुर्वाग्रह र प्रतिशोध राखेर विशेष अदालतमा मुद्दा दायर गरेको भन्दै कांग्रेसले बैठक अवरुद्ध गरेको हो ।
कांग्रेसले जग्गाफिर्ता गर्छु भन्दैमा मुद्दा नचलाउने अख्तियारको भनाई प्रति पनि कानुनी प्रश्न उठाएको छ । अपचलन भएको सम्पत्तिफिर्ता गर्छु भनेर मुद्दा नचलाउने अख्तियारको कार्यशैलीले उसको विश्वसनियतामा ठूलो प्रश्न उठेको भन्दै कांग्रेसले सरकारको विभेदकारी शैलीलाई स्वीकार नगर्ने चेतावनी दिएको छ ।
अख्तियारले बुधबार बालुवाटार स्थित ललिता निवास जग्गा प्रकरणमा गच्छदार सहित १ सय७५ जना विरुद्ध विशेष अदालतमा मुद्दा दायर गरेको थियो । नेकपाका महासचिव विष्णु पौडेलले जग्गाफिर्ता गर्छु भनेकाले मुद्धा नचलाईएको अख्तियारको आरोप पत्रमा उल्लेख छ ।
सभामुख अग्नि सापकोटाले विहिबारको बैठक सुरु भएको जनाउने वित्तिकै नेपाली कांग्रेसका सांसहरुले उभिएर विरोध जनाएका थिए । अख्तियार दुरुपयोग अनुसन्धान आयोगले सरकारको प्रभावमा परेर बालुवाटार जग्गामा राजनीतिक पुर्वाग्रह र प्रतिशोधको आधारमा मुलुकको लोकतान्त्रिक अभ्यासलाई नै कमजोर गराउने गरि मुद्दा दायर गरेको भन्दै कांग्रेसले विरोध गरेको हो ।
बैठकमा समय लिएर बोल्दै नेपाली कांग्रेसकी सचेतक पुष्पा भुषालले अख्तियार सरकारकोे लाचार छाया बनेको आरोप लगाउनुभयो ।
कांग्रेस सांसदले उभिएर विरोध जनाई राखेपछि सभामुखले शुक्रबार अपरान्ह १ बजे सम्मका बैठक स्थगित गर्नुभएको थियो ।
यो पनि पढ्नुहोस्ः
भ्रष्टाचारमा पछारिए अहिलेसम्मकै ठुला माछा, तीन पूर्व मन्त्रीसहित १ सय ७५ जना विरुद्ध मुद्दा
