नेपालगञ्ज । बाँकेमा एक व्यक्तिले पेट्रोल खन्याएर आगो लगाइदिँदा दुई वर्षे बालकको ज्यान गएको छ । श्रीमती गम्भीर घाइते भएकी छन् ।
कोहलपुर नगरपालिका–२ शक्तिनगरका ३० वर्षीय भानुभक्त विकले आफ्नै श्रीमती गंगा विक र २ वर्षीय नाबालक छोरा प्रिन्सलाई पेट्रोल खन्याएर आगो लगाएका थिए ।
जलेर गम्भीर घाइते भएका दुई वर्षीय बालक प्रिन्सको भेरी अस्पताल नेपालगञ्जमा उपचारको क्रममा आज बिहान मृत्यु भएको जिल्ला प्रहरी कार्यालय बाँकेले जनाएको छ । बच्चाको कम्मरभन्दा माथिको भाग जलेको थियो ।
श्रीमती गंगाको पनि घाँटी, हात, कान लगायतका भाग जलेको छ । प्रहरीका अनुसार गंगाको शरीरको करिब २० प्रतिशत भाग जलेको छ ।
घटनाबारे जानकारी पाएलगत्तै वडा अध्यक्ष हरि कठायत र उपमेयर सुवेदीले कोहलपुर नगरपालिकाको एम्बुलेन्सबाट उनीहरुलाई सुरुमा नेपालगञ्ज मेडिकल कलेज पुर्याएका थिए । त्यहाँ उपचार सम्भव नहुने भएपछि नेपालगञ्जस्थित भेरी अस्पताल लगिएको थियो ।
हिजो साँझ करिब ७ बजेको समयमा घरायसी झगडामा भानुभक्तले श्रीमती गंगा विक र २ वर्षिय छोरा प्रिन्स विकलाई पेट्रोल छर्किएर आगो लगाएका थिए।
आगो लगाएर भारततर्फ भागेका भानुभक्तलाई प्रहरीले गएराति साढे १ बजे नियन्त्रणमा लिको छ । उनलाई भारतको नानपारा आसपासबाट नियन्त्रणमा लिएर अनुसन्धान तथा कारबाही प्रक्रिया अघि बढाएको प्रहरीले जनाएको छ ।
