शङ्करप्रसाद पोख्रेल, बुटवल ।
राष्ट्रिय जनमोर्चाकी केन्द्रीय सदस्य तथा लुम्बिनी प्रदेशसभा सांसद तारा थापाले देशले अब सङ्घीयता धान्न नसक्ने बताउनुभएको छ ।
राजमो रुपन्देहीको आयोजनामा व्यापारिक केन्द्र बुटवलमा २०७९ माघ १४ गते शनिबार आयोजित सङ्घीयता खारेजी सभालाई सम्बोधन गर्दै उहाँले यस्तो अभिव्यक्ति दिनुभएको हो ।
‘देशले अब सङ्घीयता धान्न सक्दैन’ उहाँले अगाडि भन्नुभयो– ‘अब पनि सङ्घीयता यथावत् राखिराख्ने हो भने देशको राष्ट्रियता, सार्वभौमिकता र भौगोलिक अखण्डता नै गुम्ने छ ।’
सम्बोधनको क्रममा उहाँले सङ्घीयताको सन्दर्भमा राजावादी र राष्ट्रिय जनमोर्चाको लाइन फरक रहेको उल्लेख गर्नुभयो ।
‘राष्ट्रिय जनमोर्चाको रणनीतिक उदेश्य नयाँ जनवाद हुँदै समाजवाद, साम्यवाद रहेको छ’ उहाँले भन्नुभयो– ‘तर राप्रपाको उद्देश्य राजतन्त्र फर्काउनु रहेको छ ।’
सम्बोधनको क्रममा उहाँले देशको राष्ट्रिय जनमोर्चा मात्रै देश र जनताको एक मात्र भरपर्दो पार्टी भएको दाबी गर्नुभयो ।
सभामा अर्का अतिथि राजमो नेता वासुदेव पोख्रेलले देशको राजनीति अहिले जडिल मोडमा पुगेको बताउनुभयो ।
‘अमेरिकी साम्राज्यवाद र भारतीय साम्राज्यवादले नेपालका ठुला पार्टीमार्फत आफ्ना एजेन्डा लागु गराउन नेपालको सार्वभौमसत्तामाथि ठाडो हस्तक्षेप गरेको छ’ उहाँले अगाडि भन्नुभयो– ‘एमसिसीको माध्यमबाट नेपालमाथि सैन्य सक्रियता बढाएर चीन विरुद्ध हमला गर्ने योजनामा अमेरिका छ ।’
पोख्रेलले नेपालमा सङ्घीयता राष्ट्रियता, अर्थतन्त्र, जनसंख्या र भौगोलिक अवस्थितिका कारणले आवश्यक नरहेको बताउनुभयो ।
दुई ठुला देशको बिचमा भौगोलिक आकारका हिसाबले सानो देश नेपाल रहेको उल्लेख गर्दै उहाँले नेपालमा सङ्घीयता उचित नरहेको दाबी उहाँको थियो ।
देशमा प्रतिगामी खतरा अझै पनि कायम रहेको उहाँको भनाइ थियो । गणतन्त्र र धर्म निरपक्षताको रक्षा गर्न दबाबमूलक कार्यक्रम गरिरहनुपर्ने आवश्यकतामा उहाँले जोड दिनुभयो ।
कार्यक्रममा सम्बोधन गर्दै राजमो जिल्ला अध्यक्ष बद्रे आलमले देशमा भ्रष्टाचार व्याप्त भएकाले त्यसका विरुद्ध आम नागरिक जाग्नुपर्ने बताउनुभयो ।
कार्यक्रम राजमो जिल्ला उपाध्यक्ष इन्दिरा ज्ञवालीको अध्यक्षता, जिल्ला कोषाध्यक्ष् केपी पोख्रेलको स्वागत र राजमो जिल्ला सचिव टानबहादुर केसीको सञ्चालनमा अगाडि बढेको थियो ।
विरोधसभाको क्रममा रक्तिम सांस्कृतिक अभियानका कलाकारले जनवादी गीत तथा नृत्य प्रस्तुत गर्नुभएको थियो ।
