विराटनगर । ऋण तिर्न नसकेर काठमाडौँको संसद् भवन अगाडि एक व्यवसायीले आत्मदाह गरेको चर्चा सेलाउन नपाउँदै मोरङका अर्का व्यवसायीले समेत ऋणकै कारण आफ्नो ज्यान फालेका छन् ।
विराटनगर महानगरपालिका–३ पोखरियाका ५७ वर्षीय मोहन न्यौपानेले बुधबार घरमै झुण्डिएका हुन् ।
विगत तीस वर्षदेखि विराटनगर शनी रोडमा सञ्चालनमा रहेको शिखर इलेक्ट्रिक पसल डुबेपछि आत्महत्याको बाटो रोजेको उनले सुसाइड नोटमा उल्लेख गरेका छन् ।
न्यौपानेले लेखेको सुसाइड नोटमा विराटनगरको एक विकास बैङ्कले माघ १० गतेभित्र बैङ्कको साँवाब्याज नबुझाए सम्पूर्ण परिवारको फोटो पत्रिकामार्फत सार्वजनिक गर्ने भनेर दिएको चेतावनीपछि न्यौपानेले बेइज्जतीको डरले आत्महत्या रोजेको स्थानीयको तर्क छ ।
न्यौपानेले आत्महत्या गर्नुअघि लेखेको तनि पानाको सुसाइड नोट फेला परेको मोरङ प्रहरीले जनाएको छ। सो नोटमा विभिन्न बैङ्क तथा वित्तीय संस्था र अन्य कारोबारीहरूसँग लिएको ऋण रकम उल्लेख गरेका छन् ।
न्यौपानेले व्यवसायका लागि साङ्ग्रिला बैङ्कबाट एक करोड ४५ लाख ऋण लिएको उल्लेख छ। बैङ्कको किस्ता पाँच लाख गरी एक करोड ५० लाखको आर्थिक भार रहेको सुसाइड नोटमा उल्लेख छ।
त्यसैगरी, अर्को एक सहकारीमा १० लाख ऋण रहेको छ ।
मङ्गलबार मात्र काठमाडौँमा इलामका व्यवसायी प्रेमप्रसाद आचार्यले आगो लगाएर आत्मादाह गरेका थिए भने सोही दिन सप्तरीको छिन्नमस्ता गाउँपालिका–२ का रामदेव मरिकले पनि लघुवित्तको ऋण तिर्न नसकेर आत्महत्या गरेको समाचार सार्वजनिक भएको थियो ।
