काठमाडौं । उद्योग मन्त्रालय मागेका जनमत पार्टीका अध्यक्ष सिके राउतले सो मन्त्रालय नपाएपछि कडा आक्रोश पोखेका छन् ।
प्रतिनिधि सभाका सांसद डा. राउतले ‘शासक वर्ग पश्चगामी चरम नश्लवादीहरुको झुण्ड’ भएको बताएका छन् ।
उनले शासक वर्गले जसपा, लोसपा, जनमत र नागरिक उन्मुक्ति पार्टी सबैलाई पाखा लगाएको भन्दै गम्भीर आक्रोश पोखेका छन् । उनले शासक वर्गले अहिले मधेशी र थारुलाई राज्यबाटै बहिष्करण गरेर हेपेको आरोप लगाएका छन् ।
उनले मधेशले शासक वर्गको उक्त कदमको प्रतिकार गर्ने पनि चेतावनी दिएका छन् । उनले आफूहरुसँग सडक र आन्दोलनको विकल्प सधैं खुल्ला नै रहेको पनि उल्लेख गरेका छन् ।
मन्त्रिपरिषद् विस्तार गर्दा प्रधानमन्त्री पुष्पकमल दाहाल र एमाले अध्यक्ष केपी ओलीले यी साना दललाई वास्ता नगरेको र मन्त्रालय रोज्न लगाउँदा पनि बेवास्ता गरेको भन्दै असन्तुष्टि जनाएका हुन् ।
