काठमाडौं । मधेश प्रदेशका मुख्यमन्त्री सरोज यादवले प्रदेशसभाबाट सर्वसम्मत विश्वासको मत पाएका छन् । १०७ सदस्यीय प्रदेशसभामा १०२ जना प्रदेशसभा सदस्य मतदानमा सहभागी भएका थिए ।
मुख्यमन्त्री यादवलाई नेपाली कांग्रेससहित प्रदेशसभामा प्रतिनिधित्व गर्ने १० वटै दल र स्वतन्त्र सांसदहरुले विश्वासको मत दिए ।
मुख्यमन्त्री यादवलाई जसपाका १६, नेकपा एमालेका २३, जनमत पार्टीका १३, लोसपाका ९, नेकपा माओवादी केन्द्रका ७, राष्ट्रिय प्रजातन्त्र पार्टी र नेपाल संघीय समाजवादी पार्टीका एक/एक तथा २ स्वतन्त्र प्रदेशसभा सदस्यहरुले विश्वासको मत दिएका हुन्।
प्रदेशसभामा प्रतिपक्षमा बस्नेगरी कांग्रेसका २२ जना सदस्यहरुले समेत मुख्यमन्त्री यादवलाई विश्वासको मत दिए भने नेकपा एकीकृत समाजवादीका ७ जना प्रदेशसभा सदस्यले पनि प्रतिपक्षीमा बस्ने गरी विश्वासको मत दिएका छन्।
प्रदेशसभामा हाल १०५ सांसद छन्। माओवादीका २ प्रदेशसभा सदस्यको शपथ विवादका कारण रोकिएको छ ।
गत पुस २७ गते ६३ प्रदेशसभा सदस्यहरुको समर्थनमा यादव मुख्यमन्त्रीमा नियुक्त भएका थिए। जसपा संसदीय दलका नेता समेत रहेका मुख्यमन्त्री यादवले गत पुस २९ गते पद तथा गोपनीयताको शपथ लिएका थिए ।
प्रदेश सभामा उपेन्द्र यादव नेतृत्वको जनता समाजवादी पार्टीको सरकार छ ।
प्रतिनिधिसभामा जसपाले सभामुखमा कांग्रेसलाई सघायो
यता, प्रदेश सभामा सघाएको कांग्रेसलाई जसपाले प्रतिनिधि सभाको सभामुखमा सघाउने भएको छ । मंगलबार भएको मन्त्रिपरिषद् विस्तारलाई लिएर तीव्र असन्तुष्टि जनाएको जसपाले सभामुखको निर्वाचनमा नेपाली कांग्रेसलाई साथ दिने निर्णय गरेको हो । सभामुखको निर्वाचन बिहीबार हुँदैछ ।
मंसिर ४ को निर्वाचनमा नेकपा एमालेसँग तालमेल गरेको जसपा पुस १० मा एमाले नेतृत्वमा बनेको सात दलीय गठबन्धनमा पनि मिसिएको थियो ।
एमाले नेतृत्वको सत्ता साझेदार दलहरुसँग जसपाले उपराष्ट्रपति पद मागेको थियो । तर उपराष्ट्रपति पद नमिल्ने भएपछि जसपा आक्रोशित हुँदै मंगलबार विस्तार भएको मन्त्रिपरिषदमा सहभागी भएको थिएन।
यस्तोमा बुधबार नेपाली कांग्रेसकी सांसद ईश्वरी न्यौपानेले प्रतिनिधि सभाको सभामुख पद उम्मेदवारी दर्ता गराउँदा जसपाले समर्थन गरेको छ। उनलाई कांग्रेस र जसपासँगै एकीकृत समाजवादी र लोकतान्त्रिक समाजवादी पार्टीले पनि समर्थन गरेका छन्।
सत्तारूढ दलहरुबाट नेकपा (एमाले) का सांसद देवराज घिमिरेले उम्मेदवारी दर्ता गराएका छन्। उनलाई एमाले, माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टीसहित सत्तारुढ दलले सघाउने भएका छन्।
