देउखुरी । राष्ट्रिय जनमोर्चा लुम्बिनी प्रदेश सांसद तारा थापा क्षेत्रीले बहुदलीय व्यवस्था र धर्मनिरपेक्षताको रक्षा अहिलेको मुख्य दायित्व भएको बताउनुभएको छ ।
लुम्बिनी प्रदेश सभाको सोमबार सुरु भएको दोस्रो कार्यकालको पहिलो बैठकलाई सम्बोधन गर्दै थापाले जनआन्दोलनका उपलब्धिको रक्षा नै अहिलेको मुख्य दायित्व भएको बताउनुभयो ।
‘नेपालमा महान जनआन्दोलनद्वारा बहुदलीय व्यवस्था कायम भएको छ । धर्म निरपेक्षता कायम भएको छ । त्यसलाई बचाउनु नै अहिलेको मुख्य दायित्व हो’ उहाँले भन्नुभयो, ‘त्यसका साथसाथै राष्ट्रियता रक्षाको विषयलाई पनि जोड दिनु पर्दछ ।’
सांसद थापाले लुम्बिनी प्रैदेशको राजधानी देउखुरी प्रदेशका सबै जिल्लाको लागि पायक नपर्ने बताउनुभयो । तर, विकास निर्माणले सबै जिल्लालाई राजधानीसँग सहज पहुँच बनाउने विश्वास गर्दै उहाँले विकास निर्माणको काममा सबै दल एकजुट हुनुपर्ने बताउनुभयो ।
सांसद थापाले कम्बोडियामा केही दिनअघि भएको आगलागीको घटनामा एक नेपालीको मृत्यु भएको घटनाप्रति दुःख प्रकट गर्नुभयो ।
लुम्बिनी प्रदेशसभाका सदस्यले आइतबार (पुस १७ गते) पद तथा गोपनीयताको शपथ लिएका हुन् ।
लुम्बिनी प्रदेशसभामा प्रत्यक्ष ५२ र समानुपातिक ३५ गरी ८७ सांसद छन् भने १० राजनीतिक दलको प्रतिनिधित्व छ।
