काठमाडौं । चीनबाटै फैलिएको कोरोना भाइरस त्यहाँ भयाबह बन्न थालेको छ । चीनमा यो रोगका कारण मृत्यु हुने मानिसको संख्या १०६ पुगेको छ भने ४ हजारभन्दा बढी यसको संक्रमणमा परेका छन् ।
भाइरस उत्पत्ति भएको उहान र त्यसअन्तर्गत हुबे प्रान्त अहिले सुनसान भएका छन् । भाइरस फैलिनबाट रोक्न चीनमा यातायात आवागमनमा थप कडाइ गरिएको बीबीसीले उल्लेख गरेको छ ।
कोरोना भाइरस चीनबाहेक अन्य कम्तीमा १६ देशमा पनि फैलिसकेको छ। अहिलेसम्म चीनबाहेकका देशमा ४७ जना यो भाइरसको संक्रमणमा परेका छन्।
यी हुन् कोरोना भाइरसबाट बच्ने उपाय
संयुक्त राष्ट्रसंघ अन्तर्गतको विश्व स्वास्थ्य संगठनले कोरोना भाइरसको संक्रमण हुन नदिन तथा संक्रमण फैलिन नदिन विभिन्न उपाय अपनाउन आग्रह गरेको छ ।
यो रोगको अहिलेसम्म कुनै उपचार वा खोप पत्ता लागिसकेको छैन ।
विश्व स्वास्थ्य संगठनले दिएका सुझाव यसप्रकार छन्ः
–स्पिरिट वा तातो पानी र साबुनले नियमित हात धुनुहोस् ।
–हाच्छ्युँ गर्दा वा खोक्दा रुमाल वा टिस्यु पेपरले मुख छोप्नुहोस्
–ज्वरो र खोकी लागेका मानिससँग निकट सम्पर्क नराख्नुहोस्
–ज्वरो, खोकी वा श्वासप्रश्वासमा समस्या देखिए तुरुन्तै अस्पताल जानुहोस् र चिकित्सकलाई आफ्नो यात्राको विवरण दिनुहोस्
–जीवजन्तुबाट उत्पादित खानेकुरा काँचै तथा कम पकाएर नखानुस् । मासु वा दूधजस्ता खानेकुरा तयार गर्दा काँचोबाट पाकेकामा संक्रमण हुन नदिनोस् । एजेन्सी
नेपालमा परीक्षण सुरु
विश्वलाई नै आतंकित बनाइरहेको कोरोना भाइरसको परीक्षण सोमबारदेखि नेपालमै सुरु भएको छ । यसअघि यो भाइरस संक्रमण आशंका भएका व्यक्तिको रगत तथा र्यालको नमुना परीक्षणका लागि विदेशै पठाउनुपर्ने बाध्यता थियो ।
काठमाडौंको टेकुस्थित राष्ट्रिय जनस्वास्थ्य प्रयोगशालामै कोरोना भाइरस परीक्षण हुन थालेको छ ।
