काठमाडौं । सरकारले पासपोर्ट र लाइसेन्स लिन लाइन लाग्नुपर्ने व्यवस्था हटाउने प्रतिवद्धता जनाएको छ ।
सोमबार पुष्पकमल दाहाल प्रचण्ड नेतृत्वको मन्त्रिपरिषदको पहिलो बैठकले राहदानी, लाइसेन्स आदि वितरण हुने कार्यालयको सेवामा सुधार गर्ने निर्णय गरेको हो ।
मन्त्रिपरिषद बैठकपछि प्रधानमन्त्री दाहालले सचारकर्मीसँग सेवाग्राहीले सास्ती व्यहोर्नुपर्ने विभिन्न कार्यालयको सेवामा सुधार गर्ने निर्णय गरेको बताए।
एमालेसहितका सात दलको सहयोगमा प्रधानमन्त्री बनेका प्रचण्डले निर्वाचनमा जनताले दिएको जनमतलाई मन्त्रिपरिषदले समेटेको दाबी पनि गरे ।
उनले भने, ‘यो मन्त्रिपरिषद जस्तो किसिमले बनेको छ, गएको निर्वाचनमा मतदानको जस्तो प्रकृति देखियो त्यसलाई समेटेको छ, यो मन्त्रिपरिषदले ।’
सोमबार प्रधानमन्त्रीको शपथ लिएका प्रचण्डले आजै मन्त्रिपरिषदको पहिलो बैठक बसालेका हुन् । तीन उपप्रधानमन्त्री सहित आठ सदस्यीय मन्त्रिपरिषद गठन गरिएको छ ।
८ सदस्यीय मन्त्रिपरिषदमा उपप्रधानमन्त्री एवं अर्थमन्त्रीमा नेकपा एमालेका विष्णु पौडेल, नेकपा (माओवादी केन्द्र) बाट उपप्रधान एवं भौतिक पूर्वाधार मन्त्री नारायणकाजी श्रेष्ठ र उपप्रधान एवं गृहमन्त्रीमा राष्ट्रिय स्वतन्त्र पार्टीका अध्यक्ष एवं सांसद रवि लामिछानेले शपथग्रहण गरेका छन् ।
त्यस्तै मन्त्रीहरु मन्त्रीहरुमा ज्वालाकुमारी साह, दामोदर भण्डारी, राजेन्द्र राई र अब्दुल खानले पनि मन्त्रीको पद तथा गोपनियताको शपथग्रहण गरेका छन्।
