गोविन्दकुमार शर्मा, काठमाडौँ ।
नेपाल पत्रकार महासङ्घ उपत्यका प्रदेश समितिको दोस्रो साधारण सभा तथा सम्मेलन सम्पन्न भएको छ ।
केन्द्रीय अध्यक्ष विपुल पोख्रेलको प्रमुख आतिथ्यमा २०७९ पुस २ गते शनिबार राजधानीको अनामनगरमा सो कार्यक्रम सम्पन्न भएकोे हो ।
सम्मेलनलाई सम्बोधन गर्दै प्रमुुख अतिथि पोख्रेलले पत्रकारका हक, हित र अधिकारको पक्षमा अझै धेरै काम गर्न बाँकी रहेको बताउनुभयो ।
उहाँले पत्रकार सङ्गठनको साझा एकताले मात्र ती काम गर्न सकिने बताउँदै उहाँले त्यसका पक्षमा सुदृढ भएर काम गर्न सबैलाई आग्रह गर्नुभयो ।
प्रगतिशील पत्रकार सङ्घका केन्द्रीय सचिव प्रकाश थापामगरले नेपाल पत्रकार महासङ्घले पेसागत हक, हित र अधिकारको पक्षमा काम गर्दै आएको बताउनुभयो ।
सम्बोधनको क्रममा उहाँले पत्रकार महासङ्घ राष्ट्रियताको विषयमा नबोलेको बताउँदैे देश रहे मात्र पत्रकार र पत्रकारका हक, हितको विषयको अस्तित्व रहने बताउनुभयो ।
उहाँले पेसागत हक, हित र अधिकारका साथै राष्ट्रिय हितसितको तालमेल कायम गरी पत्रकार महासङ्घ अघि बढ्नुपर्ने आवश्यकतामा जोड दिनुभयो ।
उपत्यका प्रदेश समितिका अध्यक्ष श्रीजन झाको अध्यक्षतामा अघि बढेको उक्त कार्यक्रमको सञ्चालन प्रदेश महासचिव टेनिस रोकाले गर्नुभएको थियो ।
सम्मेलनको सो उद्घाटन सत्रमा पत्रकार महासङ्घका पूर्व केन्द्रीय अध्यक्ष तारानाथ दाहालले पत्रकार महासङ्घमा सङ्घीयता : प्रदेशको पुुनर्संरचना विषयक अवधारणा पत्र प्रस्तुत गर्नुभएको थियो ।
सम्मेलनमा महासङ्घका महासचिव रोशन पुरी, प्रेस चौतारी हेमराज सिलवाल, प्रेस सेन्टरका सागर पन्त, प्रेस युनियनका जीवन भण्डारी, श्रमजीवी पत्रकार सङ्घ जन्मदेव जैसी, साहित्यिक पत्रकार सङ्घका महासचिव चेतनाथ धमला, पत्रकार महासङ्घका केन्द्रीय सदस्य सन्तराम बिडारी, वरिष्ठ पत्रकारहरु देवेन्द्र चुँडाल, दामोदर दवाडी, ईश्वरी वाग्लेलगायतले मन्तव्य राख्नुभएको थियो ।
उद्घाटन सत्रको समापनसँगै बन्दशत्र सम्पन्न भएको थियो । बन्दशत्रमा प्रदेश महासचिव टेनिस रोकाद्वारा प्रगति प्रतिवेदन तथा कोषाध्यक्ष अर्जुन पन्तद्वारा आर्थिक प्रतिवेदन प्रस्तुत गरी पारितसमेत गरिएको थियो ।
