टिकापुर । अखिल नेपाल जनजाती सम्मेलनले मुक्त कमैया पुनर्स्थापनाका लागि सुरु गरेको ‘कञ्चनपुर–दाङ’ अभियान अन्तर्गत मंगलबार कैलालीको टिकापुरस्थित शिवनगर मुक्त कमैया बस्तीमा अन्तरक्रिया गरिएको छ ।
मुक्त कमैयाहरुका समस्याबारे सम्मेलनले मुक्त कमैया शिविरमै पुगेर पीडितहरुसँग सम्वाद गरेको हो । त्यस क्रममा मुक्त कमैयाका प्रतिनिधिहरुले आफूहरुले चर्चेको र टिकापुर बहुमुखी क्याम्पसले ओगटेको जग्गामै लालपुर्जा दिएर व्यवस्थापन गर्नुपर्ने बताएका थिए ।
टिकापुर बहुमुखि क्याम्पसका लागि टिकापुर नगरविकास समितिले ८२ बिघा जग्गा दिएको थियो । सो जग्गाको लालपुर्जासमेत क्याम्पससँग छ । तर, त्योसहित तीन सय ८२ विघा जग्गा क्याम्पसले दाबी गर्दै आएको छ । मुक्त कमैयाहरुले क्याम्पसको लालपुर्जा भएको ८२ बिघाबाहेकको जग्गामा आफूहरु बसिरहेको र सोही जग्गाको लालपुर्जा दिएर व्यवस्थापन गर्न माग गर्दै आएको जनजाती सम्मेलनका महासचिव रामबहादुर बुढाले जानकारी दिनुभयो ।
यस्तै सम्मेलनले सोमबार कैलालीकै धनगढीमा अन्तरक्रिया कार्यक्रम गरेको थियो । कार्यक्रममा सहभागी गेटी मुक्त शिविरका अध्यक्ष रतिरानी चौधरीले आफूहरुलाई राजनीतिक दलले भोट बैंक बनाएको गुनासो गर्नुभयो । रतिरानीले भन्नुभयो, ‘चुनावका बेला नेताहरु आउँछन्, डाडु–भैया–भौजी भनेर नाता लगाउँछन् । भोट लिएर गएपछि फर्केर मुख देखाउँदैनन् ।’
कार्यक्रममा एयरपोर्ट शिविरका अध्यक्ष चुलुराम चौधरीले सरकारले दिने भनेकै सुविधा मुक्त कमैयाले पाउन नसकेको गुनासो गर्नुभयो । केन्द्र र स्थानीइ तहको लडाईंका कारण गतवर्ष मुक्त कमैयाका लागि भनेर आएको २० करोड रुपैयाँ खर्चै नभइकन फ्रिज भएको उहाँको भनाई थियो । चुलुरामले भन्नुभयो, ‘केन्द्रको सरकारले सबै अधिकार स्थानीय तहलाई दिएको छ, त्यहीँ जाउ भन्छ । स्थानीय तहमा गयो भने हामीलाई केही अधिकार छैन भन्छ । हामीलाई सरकारले दिने भनेर घोषणा गरेको अधिकार पनि हामीले पाउन सकेनौँ ।’
कैलालीको अत्तरियास्थित निर्माणधिन मेडिकल कलेज क्षेत्रबाट सत्तारुढ नेकपा र प्रतिपक्षी कांग्रेसले मुक्त कमैयाहरुलाई हटाउन प्रयास गरिरहेका उनीहरुको गुनासो छ । तर, स्थानीइ स्तरमा राष्ट्रिय जनमोर्चाले मुक्त कमैयालाई साथ दिँदै आएको छ ।
यता, टिकापुरमा पनि राजमोले मुक्त कमैयालाई साथ दिइरहेको जनाएको छ । राजमो कैलालीका अध्यक्ष दयाराम सञ्ज्यालले टिकापुर क्याम्पसले पाएको ८२ बिघा जग्गामा तारबार लगाएर संरक्षण गर्नुपर्ने र बाँकी क्षेत्रमा मुक्त कमैया पुरस्र्थापना गर्नुपर्ने बताउनुभयो ।
अखिल नेपाल जनजाती सम्मेलनले मुक्त कमैया पुनस्र्थापनाको माग गर्दै आइतबारदेखि ‘कञ्चनपुर–दाङ’ अभियान सुरु गरेको हो । महेन्द्रनगरबाट सुरु भएको कार्यक्रम कैलाली, बर्दिया, बाँके र दाङका विभिन्न कार्यक्रम गर्दै माघ १२ गते दाङमा टुंगिनेछ ।
अभियान अन्तर्गत कञ्चनपुरदेखि–दाङसम्म मुक्त कमैया बस्तीमा भेटघाट, सबै जिल्ला प्रशासन कार्यालयमा पुगेर ज्ञापन पत्र बुझाउने तथा अन्तरक्रिया गर्ने कार्यक्रम रहेको सम्मेलनका महासचिव रामबहादुर बुढाले जानकारी दिनुभयो ।
यसअघि कञ्चनपुर र कैलाली जिल्लाका प्रमुख जिल्ला अधिकारीलाई १६ बुँदे ज्ञापन पत्र बुझाइएको छ भने महेन्द्रनगर र धनगढीमा अन्तरक्रिया गरिएको छ । कार्यक्रममा सम्मेलनका अध्यक्ष निमबहादुर बुढा, उपाध्यक्ष लालबहादुर राना, महासचिव रामबहादुर बुढा, केन्द्रीय सदस्य नरेश आलेलगायतका नेताहरुको नियमित टोली छ भने स्थानीयस्तरमा राजमो र अन्य जनवर्गीय संगठनकमा नेताहरु सामेल छन् ।
यो पनि पढ्नुहोस्ःमुक्त कमैयाका दुखः लालपुर्जा हातमा, खेत खोलामा !
