काठमाडौँ । मङ्सिर ४ गते हुने प्रतिनिधि सभा सदस्य तथा प्रदेशसभा सदस्य निर्वाचनको सुरक्षा व्यवस्थापनका सन्दर्भमा प्रमुख निर्वाचन आयुक्त दिनेशकुमार थपलिया र नेपाली सेनाका प्रधान सेनापति प्रभुराम शर्मासहितको उच्चस्तरीय टोलीमा २०७९ मङ्सिर २ गते भेटवार्ता सम्पन्न भएको छ ।
आयोगको कान्तिपथस्थित कार्यालयमा भएको भेटका अवसरमा प्रधान सेनापति शर्माले निर्वाचन सुरक्षाका लागि नेपाली सेनाले गर्दै आएको कामकारबाहीबारे अवगत गराउँदै हालसम्मको स्थलगत निरीक्षण र प्राप्त सूचनाका आधारमा निर्वाचनको सुरक्षा चुस्त रहेको र निर्वाचन सुरक्षित वातावरणमा सम्पन्न गराउन सेनाका तर्फबाट खेल्नुपर्ने भूमिका निर्वाह गर्न तयार रहेको स्पष्ट पार्नुभयो ।
सो अवसरमा प्रमुख आयुक्त थपलियाले निर्वाचन सुरक्षा व्यवस्थापनका लागि मतपत्र छपाइ, ढुवानी, निर्वाचन सामग्रीको जाँच तथा प्याकेजिङ कार्य तथा दुर्गम हिमाली जिल्लामा मतपत्र र मतदान सामग्री एवम् खटिएका कर्मचारीसमेत पुर्याउन नेपाली सेनाबाट प्राप्त सहयोग महत्त्वपूर्ण रहेको बताउनुभयो ।
सो अवसरमा निर्वाचन आयुक्त ईश्वरीप्रसाद पौड्याल, रामप्रसाद भण्डारी र सगुनशमशेर जबराको उपस्थिति रहेको थियो ।
उहाँहरूले निर्वाचनको तयारी, निर्वाचन आचार संहिताको पालना र निर्वाचन सुरक्षाका क्रममा नेपाली सेनाबाट उल्लेखनीय सहयोग प्राप्त भएको बताउनुभएको थियो ।
