काठमाडौं । पाँचदलीय गठबन्धनले निर्वाचनमा मत माग्न संयुक्त अपील प्रकाशन गर्ने भएको छ । शनिबार बसेको गठबन्धनमा आबद्ध दलहरूको निर्वाचन परिचालन सचिवालय समितिको संयुक्त बैठकले यस्तो निर्णय गरेको हो ।
सो अपीलमा गठबन्धन दलहरुबीच मतभेद रहेका विषयबस्तु भने समेटिने छैनन् ।
विगतमा संघीयतालाई उपलब्धिका रुपमा ब्याख्या गर्दै सत्तारुढ दलले अपील प्रकाशन गर्ने निर्णय गरेपछि राष्ट्रिय जनमोर्चाले असहमति जाहेर गरेको थियो । त्यसपछि सत्तारुढ तीन दलल नेपाली कांग्रेस, माओवादी केन्द्र र एकीकृत समाजवादीले मात्रै अपील प्रकाशन गरेका थिए ।
गठबन्धनको अपीलमा ‘संघीयता’ लेख्न राजमो असहमत, संयुक्त अपील प्रकाशन नहुने
‘आजको बैठकमा संयुक्त अपील प्रकाशन गर्ने निर्णय गरेका छौँ’ बैठकमा सहभागी राष्ट्रिय जनमोर्चाका सचिव हिमलाल पुरीले युगदर्शनसँग भन्नुभयो, ‘संघीयतालगायत मतभेद रहेका विषयहरु त्यसमा सामले हुने छैनन् । अब मतभेदका विषय हटाएर संयुक्त अपील प्रकाशन हुन्छ ।’
राष्ट्रिय जनमोर्चाले सत्तारुढ दलसँग संघीयतासँगै संसदबाट पारित नागरिकता विधेयक, एमसीसीलगायत कतिपय विषयमा असहमति राख्दै आएको छ । राजमोले प्रतिगमनलाई हराउन र संविधान एवम् लोकतन्त्रको रक्षाको विषयमा नै गठबन्धन गर्नुपरेको पनि स्पष्ट पारेको छ ।
यस्तै, बैठकले देशभर गठबन्धनमा कहाँ के समस्या छ भन्ने कुराको तथ्यांक संकलन गरेर छलफल गरेको छ । कतिपय जिल्लामा बागी उम्मेदवारहरु रहेका र निर्वाचन परिचालनमा देखिएका समस्या हल गर्ने निर्णय भएको सचिव पुरीले बताउनुभयो ।
यस्तो छ राजमोले हस्ताक्षर गर्न अस्वीकार गरेको गठबन्धनको अपील
कांग्रेस केन्द्रीय कार्यालय सानेपामा बसेको बैठकले गठबन्धनका उम्मेदवारलाई पराजित हुन नदिन गठबन्धनभित्रका बागी उम्मेदवारलाई निस्क्रिय बनाउन अधिकतम प्रयास गर्ने निर्णय गरेको हो ।
‘सबै क्षेत्रका समस्याबारे छलफल भएको छ । आन्तरिक रुपमा समस्या समाधानको पहल गर्ने भन्ने भएको छ’ उहाँले भन्नुभयो, ‘कतिपय क्षेत्रमा रहेका गठबन्धनका बागी उम्मेदवारलाई उम्मेदवारी निस्क्रिय पार्न चुनाव सम्मै पहल गरिन्छ ।’
यस्तै, बैठकले बागी उम्मेदवारलाई निस्तेज पार्ने काममा ध्यान दिन गठबन्धन दलका शीर्ष नेतालाई ध्यानाकर्षणसमेत गरेको छ ।
बैठकले एमाले नेतृत्वको गठबन्धनले चुनावी आचारसंहिता उल्लंघन गरेको आरोप लगाउँदै त्यसबारे निर्वाचन आयोगलाई सचेत गराउने निर्णयसमेत गरेको छ ।
बैठकमा नेपाली कांग्रेस, माओवादी केन्द्र, एकीकृत समाजवादी र राष्ट्रिय जनमोर्चासहित लोकतान्त्रिक समाजवादी पार्टीका नेताहरुको उपस्थिति थियो ।
गठबन्धनको बैठक : निर्वाचन परिचालनमा देखिएका समस्या समाधान गर्न पहल
