काठमाडौं । पाँचदलीय गठबन्धनले निर्वाचन परिचालनमा देखा परेका समस्या समाधान गर्न पहल गरेको छ ।
बिहीबार बसेको निर्वाचन परिचालन सचिवालय समितिको संयुक्त बैठकले निर्वाचनका क्रममा देखिएका समस्या समाधान गर्न पहल गर्ने निर्णय गरेको बैठकमा सहभागी राष्ट्रिय जनमोर्चाका सचिव हिमलाल पुरीले जानकारी दिनुभयो ।
बैठकमा विभिन्न ठाउँमा कायम बागी उम्मेदवारीको विषयमा छलफल हुनुको साथै संयुक्त परिचालनमा देखिएका समस्याबारे छलफल भएको पुरीले बताउनुभयो ।
‘कतिपय ठाउँमा अहिले पनि बागी उम्मेदवार कायम छन् । केही स्थानमा संयुक्त रुपमा निर्वाचनमा परिचालन नभएको भन्ने कुरा आएको छ’ पुरीले भन्नुभयो, ‘आज ति विषयमा मोटामोटी छलफल भएको छ । अब सबै ठाउँको तथ्यांक संकलन गरेर पर्सि बस्ने बैठकमा ठोस निर्णय हुने छ ।’
नेपाली कांग्रेसको केन्द्रीय कार्यालय सानेपामा बसेको बैठकमा कांग्रेस, नेकपा (माओवादी केन्द्र), नेकपा (एकीकृत समाजवादी), लोकतान्त्रिक समाजवादी पार्टी र राष्ट्रिय जनमोर्चाका निर्वाचन परिचालन समितिमा आवद्ध नेताहरु सहभागी थिए ।
कांग्रेसको निर्वाचन परिचालन सचिवालय समिति संयोजक अम्बिका बस्नेतको अध्यक्षतामा बसेको बैठकले चुनावी अभियानमा देखिएको समस्या समाधान गर्दै जाने विषयमा छलफल गरेको कांग्रेस नेता दिव्यमणि राजभण्डारीले बताउनुभयो । गठबन्धनका समस्या समाधान गर्दै धेरै भोट प्राप्त गर्नेगरी चुनावी अभियानमा जाने विषयमा छलफल भएको उहाँको भनाई छ ।
यस्तै, माओवादी केन्द्रका नेता महेश्वर दाहालले कतिपय ठाउँमा अझैपनि बागि उम्मेदवारहरु रहेकाले बागि फिर्ता गराउने विषयमा छलफल भएको बताउनु भयो ।
बैठकमा नेपाली कांग्रेसको तर्फबाट नेताहरु अम्बिका बस्नेत, दिव्यमणि राजभण्डारी र सुरेश आचार्यको सहभागिता थियो भने नेकपा (माओवादी केन्द्र) बाट महेश्वर दाहाल, गोविन्द आचार्य र विष्णु सापकोटाको सहभागिता थियो ।
त्यसैगरी नेकपा (एकीकृत समाजवादी) बाट लक्ष्मण केसी, लोकतान्त्रिक समाजवादी पार्टीबाट दामोदर आचार्य र राष्ट्रिय जनमोर्चाबाट सचिव हिमलाल पुरीको उपस्थिति रहेको थियो ।
