उत्तरबाट बादल आउँदा उत्तरतिरै हेर्छिन् रे
बम्बैइको कोठरीमा हाम्री चेली रुन्छिन् रे…
रक्तिम सांस्कृतिक अभियानकी गायिका लक्ष्मी गुरुङले गाएको यो गीतले रक्तिमलाई मात्रै उचाइमा पुर्याएन, गायिका गुरुङलाई पनि परिचित बनायो ।
शारीरिक रुपमा असक्त गुरुङ सुरिलो स्वर र उच्च राजनीतिक चेतनाका कारण रक्तिम सांस्कृतिक अभियानमा सक्रिय हुनुहुन्थ्यो । देश विदेशमा चेतनाका गीत गाउँदै हिँड्ने गुरुङका दर्जनौँ गीतहरु रेकर्ड छन् ।
गुरुङको गतवर्ष २०७८ कात्तिक २५ गते बुटवलमा निधन भयो । उहाँको प्रथम स्मृति दिवसका अवसर पारेर रक्तिमका कलाकारहरुले श्रद्धाञ्जली गीत सार्वजनिक गरेका छन् ।
रक्तिम सांस्कृतिक अभियान केनद्रीय समितिले आयोजना गरेको भर्चुअल कार्यक्रममा शुक्रबार साँझ नेकपा (मसाल) का महामन्त्री मोहनविक्रम सिंहले सो गीत विमोचन गर्नुभएको हो ।
‘लक्ष्मी गुरुङ शारीरिक रुपमा असक्त भएपनि चेतनाको हिसावले सशक्त’
रक्तिमका उपाध्यक्ष हेमराज आश्रमको शब्द, स्वर तथा संगीतबद्ध ‘हाम्रा प्रिय कमरेडलाई’ गीतमार्फत रक्तिमले आफ्ना अभिभावक वरिष्ठ गायिकालाई स्मरण गरेको हो ।
गीतमा गायक आश्रमलाई गायिका रिता पुनले साथ दिनुभएको छ । मुर्चुङ्गा स्टुडिओ काठमाडौंमा रेकर्डिङ गरिएको गीतको प्रकाशन गायिका लक्ष्मी गुरुङका छोरा रविन गुरुङले गर्नुभएको हो ।
