राष्ट्रिय जनमोर्चाका अध्यक्ष चित्रबहादुर केसीले नयाँ पिढीं विदेशिँदा देश खोक्रो बनेको बताउनुभएको छ । राष्ट्रियताको रक्षा र देशको उन्नतीका लागि तीनै पुस्ता साथ साथै देशमै रहनुपर्ने केसीको भनाई छ ।
शनिबार काठमाडौंमा रक्तिम सांस्कृतिक अभियान प्रदेश ३ को भेलालाई सम्बोधन गर्दै अध्यक्ष केसीले युवा शक्ति विदेसिँदा नेपालमा रोजगारीका लागि भारतीयहरु भरिँदै गएर नेपालको राष्ट्रियता सार्वभौमिकता नै खतरामा पर्दै गएको बताउनुभयो ।
‘एकातिर जनसांख्यिक अतिक्रमण छ भने अर्कोतिर भारतीय साम्राज्यवादले कालापानी, लिपुलेक, लिम्पियाधुरा लगायतका क्षेत्र अतिक्रमण गरेर आफ्नै नक्सामा सामेल गरेको छ’ अध्यक्ष केसीले भन्नुभयो, ‘शासकहरुको नालायकीका कारण देशको सार्वभौमिता र अखण्डता धरापमा पर्दै गइरहेको छ । यस्तो बेलामा सचेत युवाशक्ति दिनदिनै विदेशिन बाध्य हुनु बिडम्बना हो ।’
फरक प्रशंगमा अध्यक्ष केसीले मान्छेले हरेक क्षेत्रमा अनुशासनको पालना गर्नुपर्ने बताउनुभयो । घरब्यवहार, संघसंस्था वा राज्यसञ्चालन जहाँ पनि अनुशासनको महत्व हुन्छ भन्दै पार्टीमा पनि अनुशासनको ठुलो महत्व रहेको केसीले बताउनुभयो । पछिल्लो समय अनुशासन उल्लंघनका घटना बढ्दै गएकोप्रति वहाँले चिन्ता समेत व्यक्त गर्नुभयो । केसीले शोषणप्रधान समाजलाई बदल्न पहिले आफू बदलिनुपर्ने धारणा राख्नुभयो ।
कार्यक्रमको प्रमुख अतिथी राष्ट्रिय जनमोर्चाका नेता आनन्द शर्माले उद्घाटन गर्दै सरकारले संसदबाट पास गराउन खोजेको एमसीसी इन्डो अमेरिकी इन्डोप्यासिफिक रणनीति अन्तर्गत भएको बताउँदै केही करोड वा अर्बका लागि देशमा अमेरिकी साम्राज्यवादलाई निम्तो दिन नहुने स्पष्ट पार्नुभयो ।
भेलालाई नेकपा (मसाल) प्रदेश नं ३ का प्रवक्ता समिर सिंह अखिल नेपाल ट्रेड युनियन महासंघ (अन्टुक) का अध्यक्ष नारायण सापकोटा, र प्रगतिशील श्रष्टा दिपीन सहनीले सम्बोधन गर्नुभएको थियो ।
भेलाले बिष्णु शर्माको अध्यक्षतामा रक्तिम सांस्कृतिक अभियान प्रदेश ३ गठन गरेको छ । समितिको उपाध्यक्षमा दवी शर्मा, सचिव शोभा गोपाली र कोषाध्यक्षमा मधु क्षेत्री चयन हुनुभएको छ । सदस्यहरुमा हेमराज आश्रम, रोशन भुजेल, सृजना घोडासैनी, तुलसा बिक र चक्र चनारा चयन हुनुभएको छ ।
रक्तिमका केन्द्रीय कोषाध्यक्ष विष्णु शर्माको अध्यक्षता र सचिव हेमराज आश्रमको सञ्चालनमा अघि बढेको कार्यक्रममा कन्द्रीय सल्लाहकार मधु क्षेत्रीले स्वागत गर्नुभएको थियो । कार्यक्रममा कुवेत नेपाली एकता समाजका नरबहादुर पुनकोसमेत आथित्यता रहेको थियो ।
