बागलुङ बजार । राष्ट्रिय जनमोर्चाका अध्यक्ष तथा बागलुङ क्षेत्र नं. १ मा प्रतिनिधि सभाका उम्मेदवार चित्रबहादुर केसीले प्रतिगामीहरूले पटक पटक संविधानमाथि आक्रमण गरेको बताउनुभएको छ ।
गत २०६२–६३ को जनआन्दोलनको उपलब्धि नेपालको संविधान २०७२ मा लिपिबद्ध भएको बताउँदै उहाँले सो दाबी गर्नुभएको हो ।
अध्यक्ष केसी चुनावी प्रचार प्रसार कार्यक्रमअन्तर्गत बागलुङको निर्वाचन क्षेत्र नं. १ को काठेखोला–६ बिहु इनारपानीमा २०७९ कात्तिक १७ गते सम्पन्न कार्यक्रमलाई सम्बोधन गर्दै हुनुहुन्थ्यो ।
पटक पटकको आक्रमणबाट संविधानको रक्षाका लागि गठबन्धन गर्नुपरेको बताउँदै उहाँले राजनैतिक स्थायित्वले जनताका थोरै भए पनि समस्या सम्बोधन गर्ने बताउनुभयो ।
सम्बोधनको क्रममा संविधानको रक्षा र स्थायित्वका लागि पाँचदलीय गठबन्धनका उम्मेदवारलाई विजयी गराउन अनुरोध गर्नुभयो ।
कार्यक्रममा निर्वाचन क्षेत्र नं. १ क का प्रदेशसभाका उम्मेदवार तथा नेपाली काङ्ग्रेस बागलुङका पूर्व सभापति दीपेन्द्रबहादुर थापाले दिगो विकासबाट समृद्धिको यात्रा सुरु हुने बताउनुभयो ।
दिगो विकास स्थायी सरकारले मात्रै दिने भएकाले गठबन्धनका उम्मेदवारलाई विजयी गराउनुपर्नेमा उहाँले जोड दिनुभयो ।
कार्यक्रममा राष्ट्रिय जनमोर्चाका केन्द्रीय सदस्य राजेन्द्र ढुङ्गाना, राजमोका केन्द्रीय सल्लाहकार बेदिलाल सापकोटा, नेकपा (माओवादी–केन्द्र) का केन्द्रीय सदस्य कृष्ण केसी, नेकपा (एकीकृत समाजवादी) बागलुङका अध्यक्ष लालबहादुर थापा, नेपाली काङ्ग्रेसका नेता तथा पूर्व सांसद गोविन्द कडेल, पूर्व सांसद टङ्कप्रसाद कँडेल, संविधान सभा सदस्य रत्ना शेरचन, नेपाली काङ्ग्रेसका प्रदेश समानुपातिक उम्मेदवार ज्ञानकुमारी श्रीस कँडेल, चम्पादेवी खड्का, राष्ट्रिय जनमोर्चा प्रदेश समानुपातिक उम्मेदवार पियारी थापा र नेकपा माओवादी केन्द्रका प्रदेश समानुपातिक उम्मेदवार लक्ष्मी खड्काले मन्तव्य राख्नु भएको थियो ।
कार्यक्रम पाँचदलीय गठबन्धन निर्वाचन परिचालन समिति काठेखोला–६ का संयोजक श्रीप्रसाद न्यौपानेको अध्यक्षता, सुदीप कँडेलको सञ्चालन र गङ्गा कँडेलको स्वागत मन्तव्यका साथ सम्पन्न भएको थियो ।
कार्यक्रममा पाँचदलीय गठबन्धनका केन्द्र, प्रदेश, जिल्ला र पालिका स्तरीय नेता तथा कार्यकर्ताको आतिथ्य रहेको थियो ।
