घोराही । राष्ट्रिय जनमोर्चा, दाङ क्षेत्र नं २ को अगुवा कार्यकर्ता भेला घोराहीमा सम्पन्न भएको छ ।
घोराही नगर अध्यक्ष हरि खरेलको अध्यक्षतामा भएको भेलाले अगामी मंसिर ४ गते हुने प्रदेश र प्रतिनिधिसभा निर्वाचनमा समानुपातिक मत वृद्धिको लागि विस्तृत योजना तर्जुमा गरेको राजमो दाङले जनाएको छ ।
त्यस क्रममा विभिन्न निर्वाचन क्षेत्रमा निर्वाचन परिचालन समितिसमेत गठन गरिएको छ ।
क्षेत्र न. २ (क) मा मनिराम खनालको नेतृत्वमा पाँच सदस्यीय निर्वाचन परिचालन समिति गठन भएको छ भने २ (ख) मा हरी खरेलको नेतृत्वमा पाँच सदस्यीय निर्वाचन परिचालन समिति गठन भएको छ । यस्तै, निर्वाचन क्षेत्र नम्बर १ (ख) को घोराही क्षेत्रमा चन्द्रबहादुर नेपालीको नेतृत्वमा नौ सदस्यीय निर्वाचन परिचालन समिती गठन भएको छ ।
भेलाले गठबन्धनका उम्मेदवारहरु लाई विजयी गराउनको लागि सक्रियतापूर्वक लाग्ने निर्णय पनि गरेको छ । समानुपातिक मतको लागि अलग प्रचार अभियान चलाउने लगायतका निर्णय गरेको छ ।
भेलामा राष्ट्रिय जनमोर्चाका केन्द्रीय सदस्य तथा जिल्ला अध्यक्ष एवम् प्रदेश समानुपातिक उम्मेदवार गणेश आचार्य र अखिल नेपाल युवक संघका पूर्वकेन्द्रीय अध्यक्ष काशिनाथ पोख्रेलले देशको राजनीतिक अबस्था, गठबन्धन, समानुपातिक मतको महत्त्व एवम् पार्टी कार्यकर्ताको भूमिका लगायतका विषयमा प्रशिक्षण मन्तव्य राख्नु भएको थियो ।
कार्यक्रममा अखिल नेपाल ट्रेड युनियन महासंघ (अन्टुक)का जिल्ला सदस्य भिमकान्त पन्थी, मूल प्रवाह अखिल भारत नेपाली एकता समाजका पूर्वकेन्द्रीय नेता सुरेश पाण्डे, राष्ट्रिय जनमोर्चा जिल्ला सदस्य चन्द्र बहादुर नेपाली, खडानन्द खनाल, जिल्ला सदस्य तथा प्रतिनिधिसभा समानुपातिक उम्मेदवार कृष्णा राना, जातीय समता समाजका जिल्ला अध्यक्ष सूर्यलाल नेपाली, जिल्ला सचिव तथा प्रदेशसभा समानुपातिक उम्मेदवार बलदेब विक, अखिल नेपाल बुद्धिजीवी संघका जिल्ला अध्यक्ष चुनचुन केसीले मन्तव्य राख्नुभएको थियो ।
यसैगरी, राजमो रोल्पा जिल्ला सदस्य केबि थापा, अखिल नेपाल जनजाती सम्मेलनका जिल्ला उपाध्यक्ष जित बहादुर पुन, अखिल (छैठौं) जिल्ला कोषाध्यक्ष सुनिता आचार्य, अखिल नेपाल राष्ट्रिय उद्योग व्यापार संघका जिल्ला सदस्य रामप्रसाद पोख्रेल, होटल व्यावसायी संघका सदस्य भुवानन्द बन्जाडे, चेम्बर अफ कमर्शका जिल्ला सदस्य हरि बन्जाडे, हर्नोक काउले खानेपानी उपभोक्ता समितिका अध्यक्ष लोक बहादुर ओली, जेष्ठ सदस्य बुद्धिराम खड्का, प्रेमलाल पोख्रेल लगायतले पनि आ–आफ्नो विचार राख्नु भएको थियो ।
कार्यक्रमको उदेश्य र आगामी कार्ययोजनाबारे राजमो जिल्ला सदस्य सुशील पोख्रेलले प्रकाश पार्नु भएको थियो ।
घोराही नगर उपाध्यक्ष चन्द्रबहादुर रावतको स्वागत मन्तव्यबाट सुरु भएको कार्यक्रमको सञ्चालन नगर सचिव मनिराम खनालले गर्नु भएको थियो ।
