बुटवल । राष्ट्रिय जनमोर्चाले देशब्यापी ‘समानुपातिक अभियान’ सुरु गरेको छ । बुधबार बुटवलमा पत्रकार सम्मेलनको आयोजना गरी पार्टीलाई भोट माग्नअभियानको सुरुवात गरेको हो ।
‘गणतन्त्र, राष्ट्रियता र धर्म निरपेक्षताको रक्षा गरौं, संघीयता खारेज गरौं’ भन्ने मूल नारासहित निर्वाचनमा भाग लिने निर्णय गरेको स्पष्ट पारेको छ । भोलि (कात्तिक १७) गतेदेखि बुटवलबाट सुरु हुने अभियान कात्तिक २८ गते बुटवलमै पुगेर समापन गरिने राजमोले जनाएको छ ।
पत्रकार सम्मेलनमा बोल्दै कार्यकारी अध्यक्ष रश्मीराज नेपालीले कात्तिक १७ देखि २८ गतेसम्म देशका सम्भव भएका सबै जिल्लाहरूमा केन्द्रीय टोलीको नेतृत्वमा सो अभियान सञ्चालन हुने जानकारी दिनुभयो । त्यसक्रममा केन्द्रीय तहका नेताहरुको नेतृत्वमा आमसभा, कोणसभा, जनभेटघाटलगायतका कार्यक्रम हुने उहाँले बताउनुभयो ।
बुटवलबाट सुरु हुने अभियान कात्तिक १७ गते बुटवल, सोही दिन कपिलवस्तु (४ नं. चौक), १८ गते दाङको भालुवाङ र सोही दिन कोहलपुरमा कार्यक्रम हुनेछ ।
यस्तै, कात्तिक १९ गते बर्दियाको बाँसगढी र भुरीगाउँ, कैलालीको चिसापानीमा कार्यक्रम हुनेछ। जनमोर्चाले २० गते कैलालाीको अत्तरियार, धनगढी तथा कञ्चनपुरको बेलौरी र विनवारीमा कार्यक्रम गर्नेछ ।
यसैगरी कात्तिक २१ गते सुर्खेत, २२ गते सुर्खेतकै छिन्चु, २३ गते तुल्सीपुर र कपिलवस्तुको चन्द्रौटा, २४ गते पाल्पा, गुल्मीको तमघास र पुर्तिघाटका कार्यक्रम गर्ने जनमोर्चाले जनाएको छ।
कात्तिक २५ गते पर्वतको बिहादी र गुल्मीको कालिगण्डकी तथा २६ र २७ गते कास्कीको पोखरा २८ गते चितवन र नवलपुरको रजहरमा कार्यक्रम गरी सोही दिन बुटवल पुगेर कार्यक्रम समापन हुने छ ।
जनमोर्चाले पाँचदलीय गठबन्धनबाट प्रतिनिधि सभातर्फ प्युठान र बागलुङ १ तथा प्रदेश सभातर्फ लुम्बिनीको अर्घाखाँची क मा उम्मेदवारी दिएको छ । समानुपातिकतर्फ प्रदेश १ र २ बाहेक पाँच वटा प्रदेश र प्रतिनिधि सभातर्फ उम्मेदवारी दिएको छ ।
राजमो केन्द्रीय सदस्य इन्दिरा ज्ञवालीको अध्यक्षता र रुपन्देही जिल्ला सचिव टानबहादुर केसीको सञ्चालनमा अघि बढेको पत्रकार सम्मेलनमा पत्रकारहरुका विभिन्न जिज्ञासाका जवाफ कार्यकारी अध्यक्ष नेपालीले दिनुभएको थियो ।
