तमघास । मूल प्रवाह अखिल भारत नेपाली एकता समाज, मध्यदक्षिण क्षेत्रीय समितिले रक्तक्यानसर पीडितको उपचारार्थ सङ्कलन गरी पठाएको आर्थिक सहयोग रकम राष्ट्रिय जनमोर्चा गुल्मीले पीडितलाई हस्तान्तरण गरेको छ ।
राजमो गुल्मीका जिल्ला सदस्य गुमानसिंह पुनमगरको उपस्थितिमा २०७९ कात्तिक १२ गते आयोजित एक औपचारिक कार्यक्रममाझ पीडित छत्रकोट गाउँपालिका–५ का अर्जुन टन्डनलाई हस्तान्तरण गरिएको हो ।
जिल्ला सदस्य पुनमगरले मूल प्रवाह अखिल भारत नेपाली एकता समाजद्वारा उपलब्ध गराइएको एक लाख चार हजार आठ सय नौ रुपियाँ पीडितलाई हस्तान्तरण गर्नुभयो । सो अवसरमा सङ्क्षिप्त मन्तव्य राख्दै पुनमगरले बिरामीको शीघ्र स्वास्थ्यलाभको कामना पनि गर्नुभएको थियो ।
कार्यक्रमको अध्यक्षता गर्नुभएका छत्रकोट–५ नं. वडाका वडाअध्यक्ष रामप्रसाद कँडेलले रकम सङ्कलन गरी स्थानीयलाई सहयोग गरेकोमा सहयोगदातालाई धन्यवाद ज्ञापन गर्नुभयो।
कार्यक्रममा राष्ट्रिय जनमोर्चा छत्रकोटका खेमबहादुर बुचा, राजमोकै मिलन रेश्मी, नेपाली काङ्ग्रेसका पूर्णबहादुर बुचा र राजेन्द्र ज्ञवाली, ५ नं. वडाका वडासदस्य वीरबहादुर सोमै र तुलसीराम पन्थ, समाजसेवीहरू भीमलाल पाण्डे, मिनप्रसाद पन्त, माधव पन्त, माधव कँडेल, लीलाधर पाण्डेलगायतको उपस्थिति रहेको थियो ।
मूल प्रवाह अखिल भारत नेपाली एकता समाजको मध्यदक्षिण क्षेत्रीय समितिले सङ्कलन गरेको सहयोग गत अक्टोबर १९, २०२२ तदनुसार २०७९ कात्तिक २ गते राजमो गुल्मीलाई हस्तान्तरण गरिएको थियो । सोही रकमक पीडितकै घर पुगी हस्तान्तरण गरिएको हो ।
